5 септември 2020, Скопје – Агенцијата за кредитен рејтинг „Стандард и Пурс“ го потврди кредитниот рејтинг на земјава ББ- со стабилен изглед. 

Потврдата на рејтингот го рефлектира ставот на „Стандард и Пурс“, дека и покрај острата економска контракција во 2020 година Северна Македонија има фискален простор да управува со јавните финансии. Ова се должи на поволните очекувања за раст на економијата на долг рок, стабилизирање на долгот на умерено ниво и пристап на државата до финансиските пазари.

Како резултат на директните и индиректните ефекти, од агенцијата очекуваат годинава контракција на македонската економија за 6%, по што во 2021 година ќе следи заздравување од 3,5%. Нивната оцена е дека светската економија годинава ќе има контракција од 3,8%, а еврозоната од 7,8%, каде што се лоцирани најголем дел од трговските партнери на земјата.

Проекциите на агенцијата за кредитен рејтинг се дека до крајот на годината државниот долг ќе изнесува 51% од БДП. Финансирањето на потребите, односно на проширениот дефицит како резултат на пандемијата и на обврските што достасуваат, се обезбедени преку успешна емисија на еврообврзницата во износ од 700 милиони евра и  заемите од ММФ од 176 милиони евра и од Европска комисија од 160 милиони евра. Со овие задолжувања државата целосно обезбеди финансиски ресурси за 2020 година, при што агенцијата нотира дека ќе останат финансиски средства што ќе се префрлат за следната година.

Во извештајот се нотира и дека земјава добила зелено светло за почеток на преговорите за членство во Европската Унија и дека ова може да придонесе за интензивирање на спроведувањето на структурните реформи, а со тоа и развој на земјата. Исто така, генерално забележуваат подобрувања во политичката стабилност во земјава во последниве години.

Оваа вест е достапна и на: Albanian English

Comments are closed.

Close Search Window