Вести|

29 октомври 2022, Скопје – Република Северна Македонија го задржа кредитниот рејтинг „ББ+“ со негативен изглед, што е резултат на спроведувањето добри политики на владеење, кредибилна и кохерентна макроекономска и финансиска политика конзистентна со долго одржуваниот фиксен девизен курс. Кредитниот рејтинг „ББ+“ со негативен изглед е потврден во најновиот извештај на Агенцијата за кредитен рејтинг „Фич“.

За РС Македонија е особено значајно што кредитниот рејтинг кој е резултат на спроведувањето добри политики е задржан во услови на големо влијание од глобалната ценовна и енергетска криза.

„Фич“ во извештајот наведува дека почетокот на интегративниот процес со ЕУ ќе ја зацврсти политиката, ќе го поддржи извозот и приливот на странски директни инвестиции, со што ќе се избалансираат негативните влијанија од конфликтот во Украина.

Агенцијата предвидува дека интензивирањето на ефектите на енергетската криза и очекувањата за контракција во еврозоната ќе влијаат врз растот на македонската економија, кој ќе остане во позитивна зона, а со намалувањето на геополитичките ризици и притисоци на цената на енергијата, со подобрување на надворешната побарувачка и со постепената фискална консолидација се очекува растот на економијата да забрза и да достигне 3,2% од БДП во 2024 година.

Исто така, агенцијата предвидува зголемување на странските директни инвестиции до 4% од БДП во 2022 година поради континуираните инвестиции во енергетскиот и автомобилскиот сектор.

Според „Фич“, владините реформи и поддршката на ММФ преку Кредитната линија за претпазливост и ликвидност (ПЛЛ) ќе ја зајакнат фискалната консолидација, што би довело до намалување на фискалниот дефицит и стабилизација на долгот. Усвојувањето на новиот Закон за буџети ќе придонесе за зајакнување на фискалната рамка на земјава преку воведување фискални правила и формирање фискален совет.

Во врска со мерките што ги презема Владата како одговор на ценовната и енергетската криза во износ од 750 милиони евра, се очекува истите да влијаат врз буџетскиот дефицит во 2022 година, кој Агенцијата очекува да се намали од 2023 година со повлекување на потребата од мерки за поддршка на населението и компаниите. Исто така, и во однос на државниот долг „Фич“ очекува тој да достигне 55,2% од БДП до крајот на оваа година и 56% од БДП до 2023 година.

Кредитниот рејтинг на една земја го покажува степенот на ризик од инвестирање во неа, и е еден од клучните индикатори коишто потенцијалните инвеститори ги земаат предвид при носењето одлуки.

Претходно кредитниот рејтинг на РС Македонија го потврди Агенцијата „Стандард и Пурс“ на „ББ-“ со стабилен изглед.

Оваа вест е достапна и на: Albanian English

Напишете коментар

Вашата адреса за е-пошта нема да биде објавена.

Close Search Window