Постепеното пренесување на надлежностите на локалната самоуправа и зголемувањето на ресурсите за нивно ефективно извршување ќе ги подобрат јавните услуги кои им ги нудат општините на граѓаните и на фирмите, истакна вицепремиерот и министер за финансии Зоран Ставрески на отворањето на денешната тркалезна маса „Патоказ кон оставување систем за финансирање еднакви услуги за сите граѓани – следни чекори“.
 
Најголем број од македонските општини – 74 од постоечките 84, се влезени во втората фаза на фискална децентрализација и ги исполнија условите за финансирање со блок дотации.
 
Во текот на годинава, најави Ставерски, за општините кои се уште не се влезени во втората фаза Владата ќе продолжи со конкретни активности за подигнување на нивниот административен и фискален капацитет и тие да можат да ги користат блок дотациите.
 
Вицепремиерот потсети на мерките што беа преземени во текот на минатата и од почетокот на оваа година за зголемување на сопствените приходи на општините. Ги наведе распределбата на приходите од продажба на градежно земјиште и од концесии на минерални сурови во корист на општините, како и дополнителниот приход од еколошката такса.
 
– Со измената на Законот за финансирање на единиците на локалната самоуправа на почетокот на годинава е зголемен процентот на приходите од данокот на додадена вредност од 3 на 4,5 проценти и тој ќе се реализира етапно до 2013 година, што ќе влиаје на порастот на буџетот на општините во оваа и во наредните години, рече Ставрески.
 
Министерот за локална самоуправа Муса Џафери смета дека е потребен систем кој ќе обезбеди поголема финансиска одржливост и независност на општините, а од друга страна нема да ги загрози функциите на национално ниво.
 
– Оптимумот е веројатно во точката во која граѓаните ќе покажат задоволство од услугите што ги добиваат. Многу е тешко во услови на ограничени финансиски ресурси да се одговори соодветно на сите потреби. Затоа како што сугерираат и експертите, најпрво треба да се воспостават минимум стандарди, врз основа на кои ќе се определни цената на чинење на одредена услуга. Во тие услови фискалниот капацитет на општината ќе покаже дали и се потребни дополнителни средства од централниот буџет или пак стандардот може да го достигне сама, рече Џафери.
 
Според него, веројатно на повеќето општини и во иднина ќе им биде потребна сериозна финансиска поддршка, како наменски дотации за одредени обалсти или пак како општ грант. – Тоа е прашање на концепт и на експертска проценка. Но дефинитивно е време да се напушти системот со којшто наменските и блок дотациите ги условува со постоење на соодветна установа на локално ниво, посочи министерот Џафери.
 
Тркалезната маса „Патоказ кон оставување систем за финансирање еднакви услуги за сите граѓани – следни чекори“ е во организација на Министерството за фианнсии и Канцеларијата на Програмата за развој при ОН во Скопје.(МИА)
