Првото кредитно биро во Македонија „Македонско кредитно биро АД Скопје“ од почетокот на наредната година ќе почне да ги нуди своите производи и услуги на пазарот.
 
Ова беше најавено на одбележувањето на двегодишнината од основањето на Македонско кредитно биро АД Скопје од страна на килриншката куќа Клириншки интербанкарски системи АД Скопје.
 
– Успешноста на работењето на Кредитното биро е претпоставка за воспоставување здрави и стабилни должничко-доверителски односи и донесување на добри деловни одлуки. Неговото основање пред деве години се случи во време на глобалната финансиска криза предизвикана од лоши непрудентни деловни одлуки на менаџментот на финансиските институции во светот. Во такви услови се чини мудра и визионерска одлуката на Владата да иницира основање на приватно кредитно биро со широка база на податоци, како предуслов за донесување на здрави и економски оправдани одлуки, рече вицепремеирот и министер за финансии Зоран Ставрески во поздравниот говор по повод двегодишнината од основањето на Бирото.
 
Тој посочи дека Бирото за краток временси период привлече значителен број членки меѓу кои и Управата за јавни приходи и покрај тоа што е само давател, а не и корисник на базата на податоци на Бирото.
 
– Со ова државата и нејзините институции ја потврдија намерата за активно вклучување во системот кој треба да обезбеди сигурно управување со кредитниот ризик и водење ефикасна кредитна политика, зголемување на финансиската дисциплина, намалување на каматните стапки, спречување на презадолженоста на правните и физичките лица и привлекување инвестиции, рече вицепремиерот Ставрески.
 
Започнувањето со работа од почетокот на идната година на Бирото, како што нагласи, посредно ќе влијае на намалување на каматните стапки, бидејќи лошите пласмани влијаат на цената на кредитите.
 
Главниот извршен директор на Македонско кредитно биро Славица Богоева рече дека двојниот јубилеј што го слават денеска, две години од формирањето и започнувањето со оперативно работење на почетокот на идната година значи продолжување на успешната приказна почната пред две години.
 
– Македонското кредитно биро денеска е институција која има јасно дефинирано опкружување, цели, стратегија, мисија и визија, како и завидно успешно досие на остварување на поставените цели. Веќе имаме 84 членки од сите екомномски сектори, чиј број во континуитет се зголемува и по само две години од основањето подготвеност за почеток со оперативно делување, рече Богоева.
 
Таа посочи дека функционирањето на Бирото ќе носи корист за неговите членки, но ќе има и важна улога во менувањето и модифицирањето на однесувањето и културата на кредитокорисниците, како и за зајкнување на кредитната индустрија. Државата, како што нагласи, ќе ја почувствува користа од функционирањето на Бирото преку зголемената финансиска дисциплина во измирувањето на обврските и во подобрување на деловната клима во целина, како еден од предусловите за странски инвестиции.
 
Директорот на Мисијата на УСАИД во Македонија Мајкл Фриц истакна дека кредитните бироа нудат сеопфатни податоци за навиките за плаќање на долговите и за тековните долгови на барателите на кредити и им овозможуваат на кредитодавателите да позајмуваат средства.
 
– Целта на Проектот за деловно опкружување на УСАИД е да придонесе во градењето на човечките и функционалните капацитети на првото приватно македонско кредитно биро, рече Фриц.
 
Тој нагласи дека Кредитното биро треба да помогне во зголемување на пристапот на приватниот сектор до средства.
 
– Кредитното биро треба да даде придонес во намалувањето на трошоците за физичките лица и да ги мотивира понавремено да ги исплаќаат кредитите, рече Фриц.
 
Директорот на НЛБ Тутунска банка Ѓорѓи Јанчевски очекува започнувањето на со работа на Кредитното биро поволно да влијае на полесното функционирање на банките и зголемување на кредитната активност.
 
– Доколку Кредитното биро профункционира онака како што е замислено, а на пат сме тоа да го оствариме, ќе биде одголема помош за полесно функионирање на банките. Досега го имавме кредитниот регистар од НБРМ кој во многу помагаше во работењето бидејќи имавме увид во тоа колку која компанија е задолжена кај другите банки, сега со Кредитното биро се вклучуваат мобилните оператори и јавните претпријатија што значи дека банките ќе имаат уште подобар увид особено при доделувањето на кредитите кај граѓаните за задолженоста, односно за кредитната способност, изјави Јанчевски.
 
Тоа, според него, ќе значи олеснување на постапката и побрзо давање на кредити.(МИА)
