На 12 ноември беше организиран прием во Владата на Република Македонија по повод претседателствувањето на Вицепремиерот за економски прашања со годишните собранија на ММФ и Светска банка.
На 12 ноември беше организиран прием во Владата на Република Македонија по повод претседателствувањето на Вицепремиерот за економски прашања со годишните собранија на ММФ и Светска банка. Поканети беа видни личности меѓу кои членовите на Владата на Република Македонија, претставници на политичките партии во Македонија, истакнати бизнисмени, менаџери и банкари, како и претставници на дипломатскиот кор, меѓународните финансиски институции и странските донатори во Македонија.
Свечено обраќање имаа постојаниот претставник на Светската банка во Македонија Маркус Репник и Берт ван Селм постојаниот претставник на ММФ во Македонија, по што свое обраќање имаше ЗПВРМ Зоран Ставрески. Вицепремиерот во своето обраќање истакна дека неговото назначување е големо лично признание и привилегија, но и чест за Македонија и за земјите во целиот регион. Ова е потврда за економските политики што ги води Владата на Република Македонија, како и за одличната соработка со ММФ и Светската банка.
– Ќе добијам можност да ги промовирам интересите на Македонија и на регионот, да влијаам онолку колку може на одредени политики на ММФ и Светска банка и преку лични контакти да лобирам и политички и економски за успешна евроатланска интеграција на Македонија. Високиот профил што ќе го има Македонија на Собранието во 2008 година, каде што присуствуваат преку пет илјади инвеститори, банкари и луѓе од приватниот сектор, овозможува да се слушне за Македонија и нашата земја на некој начин да излезе на површината, да се издвои од другите земји и да биде видена во едно поубаво свет, истакна на крајот на своето обраќање Вицепремиерот Ставрески.
Настанот можеше да го следи македонска јавност преку директен пренос на Македонската радио телевизија.
