Собранието на Република Македонија претпладнево, со 60 гласови „за“, ниту еден против или воздржан, го донесе Законот за изменување и дополнување на Законот за Царинска тарифа.
 
Законот ќе стапи во сила веднаш по неговото објавување во Службен весник.
 
Со измените, меѓу другото, се изедначуваат царинските давачки за новите и употребуваните автомобили, а ќе изнесуваат пет отсто.
 
– Со иста давачка ќе се царинат сите автомобили без разлика на видот на каросеријата, техничките перформанси и кубикажата. Тоа ќе овозможи обновување на возниот парк во Македонија и ќе се стимулира купорпродажбата на нови возила, истакна Нада Станчевска од ВМРО-ДПМНЕ во кратката дискусија.
 
Пратениците по оваа точка, го донесоа и Законот за изменување и дополнување на Законот за квалитет на амбиентниот воздух.
 
Во тек е расправата по дополнетиот Предлог-закон за изменување и дополнување на Законот за заштита на природата.(МИА)
