Консолидација на надзорните институции во Mакедонија во една институција, согласно искуствата на европските земји и препораките по финансиската криза за консолидирана супервизија на банките, осигурителните друштва, инвестициските и пензиските фоднови и берзата.

&nbsp

Ова е идејата што денеска вицепремиерот и министер за финансии Зоран Ставрески ја претстави на средба со гувернерот на НБРМ Петар Гошев, директори на банките, осигурителни друштва и пазарот на капитал, која се одржа во рамки на саемската манифестација ФИНЕКСПО 2009.

&nbsp

– Ја изнесов идејата за натамошна подобра координација во делот на надзорните институции и евентуално консолидирање на финансискиот надзор. Препораките од европските земји и искуствата по финансиската криза се дека е потребна подобра координација и консолидација на финансиските институции за да бидат разменувани информациите навреме. Тоа е нешто што треба да го разговараме со сите надлежни во Македонија дали е можно и дали е пооптимално да се консолидира финансискиот надзор на банките со финансискиот надзор на осигурителните друштва, пензиските фондови и берзата, изјави министерот по завршување на средбата.

&nbsp

Тој потенцира дека ова не прејудицира каде би се извршила консолидацијата и оти може да е на едно место и тоа да е Централната банка, а може да се изврши и од друга институција. Важно е, додаде тој, да се консолидираат информациите на едно место и побрзо да оди тој проток на информации за тоа каде вложуваат банките за да може да се избегнат ризичните пласмани.

&nbsp

На средбата, како што истакна министерот, и тој и гувернерот Гошев потенцирале дека макроекономската стабилност пред се стабилноста на девизниот курс ќе бидат клучни приоритети на макроекономската политика и во тој дел координацијата на буџетската и на монетарната политика ќе овозможат да се задржат стабилноста на курсот и воопшто да се задржи стабилноста на економијата и преку понизок дефицит на тековната сметка, кој се очекува и преку одржувањето на девизните резерви на високо ниво како сега што изнесува 1,580 милијарда евра.

&nbsp

Во врска со каматните стапки на државните записи, министерот Ставрески истакна дека  износот на трезорските записи и каматните стапки се намалуваат во континуитет и оти на последната аукција каматата изнесуваше 5,3 проценти. – Тој тренд ќе продолжи и во иднина. Ние ќе продолжиме постепено во текот на 2010 година со намалување на каматните стапки и верувам дека заедно со сигналите што ги дава НБРМ и со понтамаошни чекори од страна на НБРМ во намалување на каматните стапки ќе успееме заеднички со финансиските институции да обезбедиме и повеќе кредити за стопанството и пониски камати, изјави министерот за финансии.

&nbsp

Одговарајќи на новинарско прашање за Македонската берза рече дека е најдобро да почне да се размислува за наоѓање нов развоен модел,бидејќи на начинот на кој функционира е подложна на флуктуации.

&nbsp

Според него, единствена перспектива е регионално поврзување или наоѓање силен стратешки партнер. – Јасно е, додаде Ставрески, дека на Македонската берза и треба стратешки партнер од надвор за да може да игра позначајна улога во регионален контекст.(МИА)

Comments are closed.