Прилеп, 2 февруари 2015 (МИА) – Вицепремиерот и министер за финансии Зоран Ставрески, заедно со градоначалникот на Прилеп Марјан Ристески и со Кризниот штаб од Општината, денес е на терен за да се информираат за состојбата по обилните врнежи и невремето викендов.

Тој ги посети населените места Тополчани и Чефигово, каде во близината каналот Блацо се влева во Црна Река.

Според Ставрески, состојбата е навистина сериозна, но во овие околности е под контрола.

– Обилните врнежи во пелагонискиот регион оставија сериозни последици и состојбата е навистина сериозна во сите општини и населени места во регионот. Состојбата бара зголемена будност и наше максимално ангажирање, рече Ставрески.

Вицепремиерот нагласи дека се мобилизирани сите екипи со градоначалниците и кризните штабови.

– Преземени се сите мерки да се обезбедат животите на граѓаните и да се намалат материјалните штети. Во некои села во општините Прилеп, Новаци, Могила и Кривогаштани се поплавени куќи, пред сè подрумски простории. Постепено, во текот на денешниов ден, водата се повлекува и се надеваме дека најлошото е зад нас, но мора да бидеме на терен да им помогнеме на граѓаните, изјави Ставрески.

Вицепремиерот и министер за финансии Ставрески очекува полицијата, војската, центрите за кризи со кризните штабови, јавните претпријатија и градоначалниците заедно да помогнат да се надмине состојбата на теренот.

– Состојбата во овие околности е под контрола, треба да останеме будни, но сепак сè зависи од временските услови, рече Ставрески.

Тој својата посета во пелагонискиот регион ја продолжува во општините Могила и Новаци.

Според информациите од Центарот за управување со кризи, во прекин е регионалниот пат Прилеп – Кривогаштани, кај селото Врбјани.

Оваа вест е достапна и на: English

Comments are closed.

Close Search Window