Вицепремиерот и министер за финансии Зоран Ставрески го оцени денеска објавениот податок за пораст на индустриското производство во февруари од 10,9 отсто како добар показател за посериозно заздравување на македонската индустрија.
 
– Секој пораст на индустриското производство е добар во посткризен пораст, а двоцифрен е секако одличен, изјави минситерот и додаде дека тоа е показател за посериозно заздравување на македонската индустрија. Факт е, додаде, дека има двоцифрени стапки на раст и на металната, текстилната, дрвната, а во преработувачката индустрија растот е со 16 отсто, односно дека има широк раст на индустријата во повеќе индустриски гранки.
 
Тој посочи дека ова било очекувано за Владата и оти го навестувала со почетокот на оваа година дека ќе донесе подобри економски резултати, што покажуваат еден по еден показател дека тие резултати доаѓаат.
 
– За два месеца имаме просечен раст од 8,5 отсто и тоа мислам дека е во рамки на нашите очекувања и мислам дека е малку посилен раст од она што очекувавме за годината и добро за да го реализираме предвидениот раст од 3,5 отсто за оваа година, истакна министерот за финансии.
 
За тоа како се реализираат буџетските приходи, тој истакна дека приходите се реализираат согласно предвидувањата, односно во рамки на проекцијата.
 
– Февруари го завршивме на ниво од 99,8 отсто, јануари 100,4 отсто и март согласно прелиминарните цифри ќе биде над проектираното. Ако земеме за првите три месеци Буџетот ќе биде исполнет над планираното ниво, рече министерот за финансии Зоран Ставрески.(МИА)
