Вицепремиерот и министер за финансии Зоран Ставрески во наредната година очекува зголемување на кредитната активноста на банките и намалување на каматните стапки, а основа за тоа, како што посочи, се земената кредитна линија од 480 милиони евра од ММФ и заживувањето и стабилизирањето на македонската економија.
 
– Сметам дека со чекорите што се презедоа во 2010, а тоа се координирано и синхронизирано намалување на каматните стапки и на Централната банка и на државните записи, како и со одржување на строга фискална дисциплина се помогна да се креираат очекувања кои кај банките ќе овозможат да се зголеми кредитната активност и да се намалат активните каматни стапки, изјави Ставрески, одговорајќи на новинарско прашање по денешното потпишување на договорот за заем за проектот на Град Скопје за изградба на катни гаражи.
 
Тој очекува дека овие нови моменти – кредитната линија и стабилизацијата на економската активност, банките да ги земат предвид во своите анализи и тоа да доведе до намалување на каматните стапки. Според него, тоа се сепак процеси кои во еден посткризен период не можат да се случат одеднаш, иако евидентна е тенденцијата дека за подобрите клиенти веќе има извесно намалување на каматните стапки.
 
– Банките ќе имаат постабилни услови за кредитирање и повеќе расположливи средства, така што не гледам причина, се разбира за здрави, профитабилни проекти да не се зголемува кредитната активност за 10 до 15 проценти следната година, истакна министерот Ставрески.
 
На зголемувањето на кредитната активност се очекува да влијае тоа што со средствата од ММФ и можното издавање еврообврзница ќе останат поголем износ на средства слободни од домашните банки за да ги пласираат во проекти.
 
Во текот на оваа година кредитната активност на банките е зголемена за 9 проценти, што според министерот е солидно, имајќи ги предвид околностите.
 
Според директорот на НЛБ Тутунска банка и претседател на Здружението на банкарство при Стопанската комора на Македонија Ѓорѓи Јанќевски, банкарскиот сектор согласно сигналите од НБРМ во текот на оваа година ги намали каматните стапки и се очекува наскоро анализа за тоа колку изнесува просечното намалување на каматните стапки.
 
– Каматите паѓаат, иако со побавно темпо од тоа што го очекуваат клиентите, рече Јанчевски и додаде дека каматните стапки исто така зависат и од бонитетот на клиентите и од видот на обезбедувањето.(МИА)