Скопје, 1 јули 2015 (МИА) – Македонските извозни компании од денес ќе може да се движат низ 34 земји (ЕУ, ЕФТА и Турција) само со еден транзитен документ. Ова го овозможува пристапувањето на Република Македонија кон Конвенцијата за заедничка транзитна постапка и Конвенцијата за поедноставување на формалностите при трговија со стоки, со што Македонија е и чекор поблиску кон интеграцијата во Европската унија.

Конвенциите, како што беше посочено на денешниот настан во Царинската управа на Република Македонија, обезбедуваат единствено движење на стоката во рамки на земјите членки од една влезна точка до местото на завршување на транзитната постапка, без разлика на тоа низ колку држави и гранични премини стоката треба да транзитира. Како што појасни директорката на Царинската управа Наташа Радеска Крстевска, електронската транзитна декларација со која е започната транзитната постапка во која било земја членка на Конвенцијата е прифатлива за сите земји членки.

Вицепремиерот и министер за финансии Зоран Ставрески на прес-конференцијата во Царината истакна дека Конвенцијата значи побрз проток на стоката што позитивно ќе влијае на конкурентноста на македонската економија и трговската размена со земјите членки на оваа Конвенција.

– Кога станува збор за интеграција на Македонија во ЕУ, станува збор за подигнување стандарди и реализација на активности кои ќе ја подобрат позицијата и конкурентноста на земјата. Токму ова е една таква активност и сите мерки и активности што се презедоа значат подигнати стандарди на работењето на Царинската управа во овој сегмент и активност од која ќе имаат корист и компаниите, рече министерот за финансии.

Тој појасни дека за компаниите ова значи намалување на времетраењето на чекање на границите, намалени трошоци од аспект на превозот на стоката и времето и олеснување на постапката.

Верува дека македонските компании ќе ја искористат оваа можност и ќе се вклучат активно во користењето на заедничката транзитна постапка.

Тој додаде дека Македонија е прва земја од земјите на Западен Балкан која пристапува кон Конвенцијата во која пристап имаат 34 земји, односно 28-те земји членки на ЕУ, членките на ЕФТА – Исланд, Норвешка, Лихтенштајн и Швајцарија, како и Турција.

Посочи дека Македонија конечно по долги години труд и макотрпна работа стана членка  и оти со тоа од денес Македонија е на чекор поблиску кон интеграцијата во ЕУ.

Со заедничката транзитна постапка движењето на стоката е полесно и побрзо, царинските формалност се поедноставни и транзитот е поефикасен. За царинската служба, како што вели директорката, со заедничката транзитна постапка се подобрува системот за превенција и полесно се откриваат измамите, а безбедноста при спроведувањето на транзитните операции е зголемена.

Пристапувањето кон заедничкиот транзитен систем значи усогласување на законодавството, обука на цариниците и економските оператори, како и развивање  софтвер кој ќе може да се поврзе со сите земји членки на Конвенцијата, а кој е развиен со три милиони евра финансиска поддршка од ЕУ преку програмата ИПА 2008 и 0,5 милиони евра учество на Владата на Република Македонија.

Оваа вест е достапна и на: English

Comments are closed.