5 јуни 2018, Скопје – Граѓаните ќе можат повторно да поднесуваат барања за приватизација на градежно земјиште, а стапката на ДДВ за станови останува повластена пет отсто во следните пет години, изјави денеска министерот за финансии Драган Тевдовски. Како што истакна, направени се законски измени кои ќе излезат во пресрет на барањата на граѓаните.
– Министерството за финансии подготви законски измени со кои на граѓаните повторно им се дава можност да поднесуваат барања за приватизација на државно градежно земјиште. Рокот за поднесување барања беше истечен во декември 2014 година и во меѓувреме граѓаните не можеа да ги поднесуваат. Сега барања ќе може да се поднесуваат повторно, заклучно со декември 2021 година. Исто така, за да се излезе во пресрет на граѓаните, Министерството направи измени и во Законот за ДДВ со кој се продолжува повластената стапка на ДДВ од пет отсто заклучно до 2023 година, рече Тевдовски.
Министерот посочи дека во изминатиот период повеќе граѓани кои не успеале да поднесат барање за приватизација на земјиштето барале да се продолжи рокот. Исто така, во интерес на граѓаните е продолжено важењето на повластената стапка на ДДВ за прв промет на стан.
Како што истакна министерот за финансии, со законските измени за приватизација на градежното земјиште се предвидува и пролонгирање на одредбата за утврдување кирија за оние кои не го приватизирале. Исто така, се пролонгира рокот за поднесување барање за трансформација на корисничкото право во право на сопственост заклучно декември 2022 година. (МИА)
Оваа вест е достапна и на:
