Вести|

Европската инвестициска банка (ЕИБ) ќе продолжи да инвестира во општествениот и економскиот развој на Република Северна Македонија со поддршка на проектите за побрзо закрепнување на економијата од последиците од пандемијата на КОВИД-19, со посебен фокус на малите и средни претпријатија, како и на проектите од Зелената агенда за инвестиции во обновлива енергија, енергетската ефикасност и дигитализацијата како дел од програмата што произлегува од Економскиот инвестициски план за Западен Балкан.

Ова е заедничкиот заклучок од средбата на претседателот на Владата на Република Северна Македонија, Зоран Заев и министерот за финансии, Фатмир Бесими со претседателот на ЕИБ, Вернер Хојер и со потпретседателката на банката, Лилјана Павлова.

ЕИБ е подготвена да ја прошири својата успешна соработка со Владата на Северна Македонија и понатаму да придонесе за остварување на европските стандарди за конкурентност на македонската економија, да поддржи големи инфраструктурни проекти и транзиција кон позелен и пооддржлив економски модел. До денеска, ЕИБ инвестираше близу 970 милиони евра во 29 проекти во Република Северна Македонија, поддржувајќи клучни сектори на економијата – инфраструктурата, енергијата, транспортот и малите и средните претпријатија.

– Владата на Северна Македонија неодамна го одобри Зеленото сценарио за структурен развој на секторите транспорт, енергија, животна средина и климатски промени. Имаме амбициозна агенда којашто ќе биде поддржана со значителни инвестиции, како придонес за иднината не само на Северна Македонија, туку и на Европа како целина. Ние веруваме дека Европската инвестициска банка може да биде наш клучен партнер во овој потфат и очекуваме блиска и успешна соработка во следните години, истакна премиерот Заев на средбата со првите луѓе на ЕИБ.

На работниот состанок на владината делегација со ЕИБ беше нагласено дека традиционалното партнерство продолжува и во претстојниот период, со поддршка за спроведување на двата моментално клучни проекта во Северна Македонија, за коишто земјата аплицираше на последниот повик за инвестициски грантови во рамките на Инвестициската рамка за Западен Балкан, а тоа се Пречистителната станица во Скопје и третата фаза од железничкото поврзување на Коридорот 8, источно крило кон Бугарија.

– На претседателот Хојер му ја пренесов нашата заинтересираност за подобра соработка при спроведувањето на нашата инвестициска агенда презентирана преку Единствената листа проекти, за што го поканивме ЕИБ да отвори свое претставништво во Северна Македонија. Сè на сè, одличен почеток на работната посета на Луксембург, особено со охрабрувањето што го добивме од врвот на банката за сите наши планови во постковид периодот и за нашиот план за рестарт на економијата и за враќање на развојните трендови коишто Европската инвестициска банка ги препозна и ќе ги поддржува и во иднина, изјави премиерот Заев.

Претседателот на ЕИБ, Вернер Хојер рече дека приоритет на банката е да ја поддржи Северна Македонија што побрзо да се опорави од пандемијата на КОВИД-19 и да напредува на својот пат за пристапување во ЕУ.

– Подготвени сме да ја поддржиме транзицијата на земјата кон позелена, поинклузивна и пооддржлива економија со финансирање и технички совети. Премиерот Заев и јас споделуваме европска визија и посветеност кон економски силен регион на Северна Македонија и Западен Балкан и сакаме да видиме поголеми придобивки за Северна Македонија од Економскиот инвестициски план на Европската комисија. Како климатска банка на ЕУ, ЕИБ ја поздравува силната посветеност на премиерот Заев за поддршка на распространувањето на Зелената агенда и јас сум задоволен што гледам напредување на зелените инвестиции за Северна Македонија, потенцираше претседателот на ЕИБ, Хојер.

Потпретседателката на ЕИБ, одговорна за Северна Македонија, Лилјана Павлова, додаде дека фокусот на Европската инвестициска банка во наредниот период е ставен на можностите утврдени во Економскиот и инвестициски план, како и кон брзото закрепнување од пандемијата предизвикана од КОВИД-19, создавањето посилен регионален пазар и подобра клима за инвестиции.

Амбасадорот Дејвид Гир, кој, како шеф на Делегацијата на ЕУ, по повод одржувањето на состанокот, изјави дека Европската Унија и Владата на Северна Македонија градат партнерство коешто се стреми кон повеќе и дека заеднички ги развиваат најдобрите решенија за промовирање на Зелената агенда, промовирање на поврзаноста и зајакнување на трговијата во рамките на Заедничкиот регионален пазар при што Економскиот инвестициски план во овој контекст има клучна улога за нивна реализација.

Како дел од целокупните напори на ЕУ, во рамки на Тим Европа за ублажување на економскиот пад од пандемијата на КОВИД-19, ЕИБ во 2020 година инвестираше 20 милиони евра за поддршка на македонските мали и средни претпријатија, со што им овозможи на локалните компании пристап до нови извори на финансирање за надминување на ограничувањата на ликвидноста и за зачувување на работните места за време на пандемијата.

На средбата на владината делегација со ЕИБ во Луксембург беа најавени нови значителни финансиски средства за македонските мали и средни претпријатија во 2021 година.

Оваа вест е достапна и на: Albanian English

Напишете коментар

Вашата адреса за е-пошта нема да биде објавена. Задолжителните полиња се означени со *

Close Search Window