Вести|

14 април 2021, Скопје – Даночната реформа започнува годинава, преку реализација на 13 цели и 40тина активности и многубројни подактивности од Акцискиот план за 2021 година за спроведување на Стратегијата за реформа на даночниот систем 2021-2025 година. Мерките предвидуваат анализи, примена на модели и искуства, а ќе бидат проследени со јавни расправи и консултации. Решенијата што ќе се донесат ќе бидат резултат на овој процес.

 

Во рамки на овој процес е и денешната дискусија за даночната реформа што ја одржа министерот за финансии, Фатмир Бесими со претставници на академската и експертската заедница, академици од Македонската академија на науките и уметностите Таки Фити и Абдулменаф Беџети и универзитетски професори и експерти коишто ја покриваат областа на даночната регулатива како Трајко Славески, Владимир Филиповски, Никола Поповски, Александар Стојков, Благица Петрески, Марјан Петрески, Александра Наќева-Ружин, Глигор Бишев, Никица Мојсовски и Горан Рафајловски.

Подобрување на постојната даночна политика и нејзино усогласување со ЕУ, обезбедување праведна конкуренција, анализа на даночната основа, намалување на даночната евазија, намалување на даночните долгови, подобрување на капацитетите на институциите во даночниот систем, зголемување на транспарентноста, подобрување на контролните механизми, подобрување на услугите и воведување стимуланси за еколошка одговорност и „зелено“ оданочување се конкретните цели опфатени со Акцискиот план за годинава.

Активностите што треба да се реализираат во рамки на овие цели се анализа на даночната основа и евентуални измени на даноците на личен доход, на добивка и на имот, како и анализа на даночните олеснувања. Понатаму, предвидени се активности за спречување даночна евазија, подобрување на фискализацијата, кешлес околина, модернизација на услугите, развој на човечки ресурси и изготвување предлози за воведување стимуланси за еколошка одговорност, како и други активности во рамки на целите.

Петте приоритети што треба да се постигнат со спроведување на овие цели и активности се: 1) поголема праведност во оданочувањето, 2) подобра ефикасност и ефективност на даночните приходи во насока на наплата на приходи, 3) поголема даночна транспарентност, 4) поголем квалитет на услугите и 5) воведување зелено „еколошко“ оданочување.

Министерството за финансии и Владата се залагаат за градење подобар даночен систем којшто ќе биде ефикасен, транспарентен, современ, едноставен и праведен, и како таков ќе биде основа за забрзан економски раст и развој. Ова ќе се спроведе преку еден транспарентен и инклузивен процес на консултации и јавни расправи со засегнатите страни, кој започна минатата недела со средбата на министерот за финансии со претставници на стопанските комори, а ќе продолжи и во иднина.

Оваа вест е достапна и на: Albanian English

Напишете коментар

Вашата адреса за е-пошта нема да биде објавена. Задолжителните полиња се означени со *

Close Search Window