Вести|

4 март 2022, Скопје – Актуелните настани, енергетската криза и нивното влијание врз економиите на РС Македонија и на Република Бугарија, како и можностите за меѓусебна соработка беа теми на средбата на министерот за финансии, Фатмир Бесими со амбасадорот на Р Бугарија во земјава, Ангел Ангелов.

На средбата, министерот Бесими истакна дека РС Македонија одблиску ги следи промените што се случуваат во светските економски текови коишто се дестабилизирани од новонастанатата состојба и дека, како и досега, дејствува максимално одговорно и во најдобар интерес на заштита на домашната економија и финансиската состојба на граѓаните.

Двете држави преземаат повеќе активности за унапредување на економската соработка. На конкретни активности се работи и преку работните групи формирани од почетокот на оваа година, по одржаната прва заедничка седница на владите на РС Македонија и Р Бугарија, кои разработуваат идеи што беа изнесени на одржаниот прв состанок на Работната група за економија, трговија и иновации.

Амбасадорот Ангелов упати на значењето на одржаниот прв состанок на Работната група за економија, трговија и иновации одржан во Скопје, со кој претседаваа министерот за финансии Фатмир Бесими и министерот за иновации Даниел Лорер, и дека се работи конкретно на договорените активности.

На средбата беше истакнато дека двете земји заеднички работат на спроведување на зелената агенда и на размена на искуства и препораки во оваа област. Бугарија е нето-производител на електрична енергија и од тој аспект на средбата беше разговарано за обезбедување полесен пристап кон електрична енергија, за што би се формирала заедничка единица за реализација на оваа активност.

Се работи на повеќе проекти за инфраструктурно поврзување помеѓу двете земји. Еден од нив е железничката пруга кон границата со Бугарија, во склоп на кој се очекуваат активности за изградба на втората делница Бељаковце – Крива Паланка, а за третата делница Крива Паланка – граница со Р Бугарија веќе се затвора финансиската конструкција и изградбата се планира да заврши до 2029 година. Со заем од Светска банка се работи на проектот за надградба и развој на патната делница Ранковце – Крива Паланка, а со средства од ЕБОР и инвестициски грант од ВБИФ на патната делница Крива Паланка – Деве Баир.

Оваа вест е достапна и на: Albanian English

Напишете коментар

Вашата адреса за е-пошта нема да биде објавена.

Close Search Window