Тевдовски: Праведниот данок е успешна реформа, економијата во одлична кондиција

Позитивните очекувања за праведното оданочување се реализираат, истакна министерот за финансии Драган Тевдовски на прес-конференција. Toj посочи дека економијата е во одлична кондиција, што е доказ дека реформите во фискалниот систем се во вистинска насока.

Тевдовски истакна дека со средствата од праведното оданочување се поддржува социјалната реформа односно обезбедување фер општество и праведен раст за сите.

- Од неделава започна исплатата на зголемената социјална помош согласно правата предвидени со новата социјална реформа. Над 25.000 домаќинства добија гарантиран минимален приход, којшто е значително повисок за поголемиот дел од нив - рече министерот за финансии.

Тевдовски презентираше 7 факти за економските остварувања, по воведувањето на праведното оданочување. Посочи дека во првото тримесечје бројот на вработени е зголемен за 17.000 лица, а невработеноста е сведена на најниско ниво од спроведување на анкетата на работна сила.

- Иако пред воведувањето на праведниот данок во јавноста беше изразена загриженост дека праведното оданочување ќе ја намали вработеноста, се случи сосем спротивното, односно само за едно тримесечје бројот на вработени е зголемен за 17.000 лица.

Во однос на вработеноста кај младите, министерот за финансии рече дека и покрај стравувањата дека ќе се намали бројот на вработените кај младата популација по воведување на прогресивното оданочување, во првото тримесечје од 2019 година има раст на вработеноста кај младите за 6000 лица во споредба со последното тримесечје од 2018 година.

Раст има и кај просечната нето-плата во првите три месеци од 2019 година во споредба со првото тримесечје од 2018 година и тоа за 3,4%, што е повисоко ниво во однос на седумгодишниот просек, рече Тевдовски. Министерот за финансии истакна дека ова е наспроти тезите што постоеле во јавноста дека воведувањето на праведниот данок ќе влијае на работодавачите да ги намалат платите на работниците.

- Напротив, во континуитет имаме зголемување на просечната плата. Зголемена е и просечната плата на програмерите во првото тримесечје од 2019 година за 5,5%. Бројот на вработени во дејноста Информации и комуникации исто така е зголемен за 1.500 лица во споредба со последното тримесечје од 2018 година или за 5.000 лица во однос на истиот период лани. Кога дебатиравме за воведување на праведното оданочување имаше стравувања токму од овој сектор дека ќе има намалување на платите и на бројот на вработени, бидејќи овој сектор беше најблиску до границата за прогресивната даночна стапка. Сепак, се случи токму спротивното и имаме позитивни резултати и тука - нагласи министерот за финансии Тевдовски.

Тој посочи дека од почeтокот на годината имаме добра наплата на данокот на личен доход или за 17,4% повеќе во споредба со истиот период минатата година.

- Ова е спротивно на одредени тврдења пред воведувањето на праведното оданочување, дека тоа ќе ја зголеми даночната евазија. Имаме навистина солидни остварувања и во реалниот сектор од почетокот на годинава. Индустриското производство во периодот јануари - април 2019 година е повисоко за 7,9% во споредба со истиот период минатата година, а извозот на стоки и услуги во периодот јануари - април 2019 година е повисок за 15% во споредба со истиот период лани. Инаку, просечната стапка на раст на извозот во последните 7 години изнесува 9,2%. Ова е спротивно на некои мислења што претходно постоеја во јавноста дека прогресивното оданочување ќе му наштети на бизнисот - вели Тевдовски.

Министерот за финансии посочи дека целосниот економски резултат, односно растот на БДП во првото тримесечје изнесува 4,1% и претставува навистина добро остварување, што е спротивно на тврдењата дека праведното оданочување ќе го блокира економскиот раст.