Ангеловска: Со проектна документација за изградба на 270 километри локални патишта го поттикнуваме локалниот развој во 78 општини

9 јануари 2020, Скопје – Со проектната документација што Министерството за финансии им ја врачи на 78 оштини, ќе бидат изградени или санирани локални патишта во должина од 270 километри. Во рамки на Проектот за подобрување на општински услуги (МСИП) што со Светска банка го реализира посебна проектна единица на Министерството за финансии, обезбедени се грант средства од 1,1 милион евра како техничка помош за општините. На доделувањето на проектната документација на општините, министерката за финансии Нина Ангеловска рече дека со тоа се надминува проблемот со недоволно искористување на средствата од меѓународните фондови.

- Досегашното искуство покажа дека општините или воопшто немаат техничка документација за проектите што сакаат да ги реализираат, или пак немаат комплетна техничка документација, согласно насоките и барањата на меѓународните фондови. Тоа често доведува до недоволна искористеност на меѓународните фондови. За да се надмине ваквата состојба, дел од средствата наменети за техничка помош беа искористени токму за оваа намена - укажа Ангеловска.

Со готовите проекти, првите 35 општини ќе можат да изградат или да аплицираат за финансирање на околу 105 километри локални патишта, а бенефит ќе имаат над 120.000 жители. До крајот на март оваа година ќе се изготви техничката документација и за останатите општини.

Директорот на Канцеларијата на Светска банка во земјава, Марко Мантованели истакна дека се исклучително задоволни од досегашната реализација на Проектот за подобрување на општински услуги - МСИП, со кој досега биле изградени повеќе од 24 илјади водоводни приклучоци, повеќе од 200 илјади луѓе имаат пристап до редовно собирање цврст отпад, а веќе се изградени и над 200 километри локални патишта.

- Сфативме дека не само пристапот до финансиите, туку квалитетните проекти и квалитетните предлози се најважната состојка за да имаме успешно спроведување на проектите во општините. Токму затоа, задоволни сме што се мобилизиравме и даваме признание на оваа техничка помош за поддржување на техничкиот квалитет, особено кај локалните патишта и одржливоста на инвестициите на локално ниво. Ова е исклучително важна инвестиција и во однос на една паралелна операција што ја поддржуваме и со неа финансираме 70 милиони евра во локални патишта заедно со Министерството за транспорт, при што општините ќе имаат пристап до овие финансии во вид на грантови, и истите ќе варираат од 150 илјади евра за најмалиот до 1,7 милиони евра за најголемиот грант. Тоа е една важна линија на финансирање, која ќе биде поддржана со овие технички документации што се изработуваат во однос на овој важен проект - рече Мантованели.

Градоначалникот на Гази Баба, Борис Георгиевски, рече дека со изготвената проектна документација, населбата Хиподром ќе добие целосна патна инфраструктура, која ќе ги поврзе новиот и стариот дел, проблем кој чекал на реализација повеќе од 16 години.

- Особено сум среќен што децата кои живеат подалеку од ООУ „Вера Јоциќ“ повеќе нема да имаат потреба да патуваат со километри за да стигнат до него. Исто така, за жителите кои го користат јавниот превоз лесно ќе биде достапна последната постојка на автобуската линија 50, а побрзо ќе стигнуваат и до трговскиот центар. Едноставно, сега граѓаните лесно ќе можат да циркулираат низ сопствената населба - нагласи градоначалникот Георгиевски. 

Со обезбедената проектна документација, во општина Гази Баба ќе се реконструира улицата пред основното училиште „25-ти Мај“ и околу 1.400 деца што учат во него ќе бидат побезбедни затоа што е предвидено да се изградат тротоари, а со новиот сообраќаен режим се предвидува намалување на брзината на движење низ улицата на 30km/h. Во Охрид, ќе се реконструира улицата „Ѓорче Петров“ каде што постоечкиот коловоз е во лоша состојба, со многу дупки и пукнатини, а асфалтот се рони.  Општина Свети Николе доби проектна документација за изградба на нов заобиколен пат околу градот, во должина од 2 км, за да можат товарните камиони од населените места во Источниот и Североисточниот плански регион да имаат директен пристап до новопланираната модерна регионална депонија кај месноста Мечкуевци, која треба да биде изградена во следните 3 до 5 години. За општина Зелениково, изготвен е проект за реконструкција на патот од с. Орешани до автобуската станица во селото, а во општина Липково над 5.800 жители ќе имаат бенефит од реконструкцијата на локалниот пат меѓу с. Оризари и с. Слупчане во должина од 3 км.