Министерството за финансии денес продаде 6-месечни државни записи со девизна клаузула во износ од 1.983.590.000 денари, со каматна стапка од 4,99 отсто, со што продолжува трендот на намалување на каматните стапки.
 
Од воведувањето на државни хартии од вредност во Република Македонија, ова претставува историски најниската каматна стапка реализирана на аукциите на 6-месечни државни записи. Од воведување на инструментите со девизна клаузула, каматната стапка е намалена за 4 проценти.
 
На денешната аукција беа понудени државни записи во вредност од 2.000.000.000 денари, додека побарувачката изнесуваше 1.983.590.000 денари.
 
Во текот на утрешниот ден за отплата достасуваат 3.180.020.000 денари, што споредено со денешниот износ од 1.983.590.000 денари претставува намалување на долгот на државата по основ на издадени државни записи за 1.196.430.000 денари, односно 19,45 милиони евра.
 
Министерството за финансии продолжува со реализирање на најавите за намалување на каматната стапка на државните записи, како и намалување на износот на задолжување, што воедно претставува и исполнување на барањата на бизнис заедницата. Целта е да се подобри ликвидноста во стопанството, а на фирмите да им се овозможи пристап до капитал по пониски каматни стапки.
