20 јануари 2019, Скопје – Влезот во НАТО ќе дејствува како катализатор на економскиот раст во Македонија, вели министерот за финансии Драган Тевдовски. Тој посочува дека стабилноста и меѓународната позиција што ги добива земјата со членството, кај земјите што пристапиле кон Алијансата резултирале со повисоки инвестиции, поголема економска активност, намалување на невработеноста и подигнување на животниот стандард.
– Значително забрзување на економскиот раст се забележува кај сите земји од регионот, по пристапувањето во Алијансата. Стабилноста и меѓународната позиција што ја обезбедува членството, придонесуваат за неколкукратно подобрување на повеќе економски показатели. Пред сѐ, тоа се забележува кај странските директни инвестиции. На пример, по пристапувањето во НАТО, во Бугарија трикратно се зголемија странските инвестиции, а во Албанија двојно – вели Тевдовски.
Тој посочува дека новите инвестиции значат нови работни места, нова додадена вредност, зголемување на обемот на трговија и зголемена економска активност.
– На пример, по влезот во НАТО растот на БДП во Бугарија е зголемен од 2,8% на 6,7% во просек. Невработеноста кај земјите кои пристапија во НАТО во 2004 година во просек е намалена од 11,4% на 6,3%. Сето тоа резултира со подигнување на животниот стандард, што се покажува и преку растот на номиналниот БДП per capita усогласен за паритетот на куповна моќ, кај овие земји – вели Тевдовски.
Неделава кредитната агенција „Фич“, како и реномираниот фонд за управување со средства „Итон Венс“ посочија дека Македонија има напредок во евроатлантските интеграции и дека местото ѝ е во ЕУ и во НАТО. Од „Фич“ истакнаа дека тоа влијае на забрзување на економската активност, додека „Итон Венс“ ја оценија Македонија како најпривлечна дестинација за инвестирање во Централна и Источна Европа.
Оваа вест е достапна и на:
