Министерството за финансии денес продаде 6-месечни државни записи со девизна клаузула во износ од 1.500.000.000 денари, со каматна стапка од 5 отсто.Во текот на шестгодишниот развој на пазарот на државни хартии од вредност во Република Македонија, ова претставува историски најниската каматна стапка реализирана на аукциите на 6-месечни државни записи. Од воведување на инструментите со девизна клаузула, каматната стапка е намалена за 50 базични поени.
 
Беа понудени државни записи во вредност од 1.500.000.000 денари, додека побарувачката изнесуваше 1.717.030.000 денари.
 
Утре достасуваат за отплата 6-месечни државни записи во вредност од 1.500.000.000 денари, односно нема ново задолжување на државата, туку сервисирање на постојните обврски по основ на претходно емитувани записи.
 
Министерството за финансии ги реализира најавите за намалување на каматната стапка на државните записи, како и за намалување на износот на задолжување, што воедно претставува и исполнување на барањата на бизнис заедницата. Ова е секако позитивен сигнал за намалување на каматна стапка во економијата и поддршка за стопанството, кој веруваме ќе биде следен и од другите надлежни институции.
