Скопје, 27 август 2015 (МИА) – Од септември повторно почнува караванот „Купи куќа, купи стан“ што го спроведува Министерството за финансии со цел одблизу да ги запознае граѓаните со можностите што ги нуди овој проект.
Караванот почнува на 2 септември во Штип, а потоа секоја среда ќе бидат посетени други градови низ државата.
– Целта ни е да одиме во оние места каде претходно не сме поминале, а тоа се пред сè Тетово, Струмица, Куманово, Велес и неколку други градови, но по вторпат ќе ги посетиме и Охрид, Прилеп и други места каде постоеше добар интерес за проектот. Целта на проектот е да се доближиме до граѓаните во внатрешноста на државата и да им овозможиме на едно место да ги добијат сите информации, изјави денес вицепремиерот и министер за финансии Зоран Ставрески.
Досега 630 семејства ги искористија можностите што им ги нуди проектот и на тој начин го решија станбеното прашање. Главно, односно 70 проценти од нив се од Скопје, но интерес има и во внатрешноста на државата. Така, на пример во Битола 39 семејства го решиле станбеното прашање преку проектот „Купи куќа, купи стан“, во Струмица 34 семејства, во Куманово 28…
– Проектот „Купи куќа, купи стан“ е наменет за граѓаните кои имаат приходи, но тие не им се доволни во првите неколку години за да ја отплаќаат ратата за стан или да платат учество за добивање кредит за изградба на куќа. Во тој дел помагаме со субвенции. На пример, ако граѓанинот сака да купи стан и аплицира во банка за кредит од 30 илјади евра, тогаш месечната рата би била околу 184 евра, а со проектот „Купи куќа, купи стан“ 92 евра ќе плаќа државата, а 92 евра граѓанинот, појасни вицепремиерот Ставрески.
Тој додаде дека субвенциите за куќа се поголеми, односно ако некој сака да гради куќа тогаш може да добие од 10 до 15 илјади евра поддршка од државата.
„Купи куќа, купи стан“ е владин проект кој се спроведува преку Министерството за финансии. Граѓаните кои немаат друг имот на свое име и чии месечни приходи не надминуваат 900 евра, можат да аплицираат за два вида субвенциониран станбен кредит за купување или доградба на куќа или за купување стан.
Оваа вест е достапна и на:
