14 ноември 2022, Скопје – Предлог-законот со кој на РС Македонија ќе ѝ се овозможи пристап до 530 милиони евра средства од Инструментот за претпазливост и ликвидност на ММФ денеска доби поддршка во собраниската Комисија за финансирање и буџет. Предложеното законско решение пред членовите на Комисијата го образложи министерот за финансии Фатмир Бесими, а пристапот на земјата да користи средства од Инструментот за претпазливост и ликвидност е потврда од страна на ММФ за спроведувањето здрави политики.
„Обезбедувањето средства преку овој Инструмент е дел од стремежите на Владата на РС Македонија и Министерството за финансии во овие услови на криза, кога на пазарите на капитал се високи цените, да се обезбеди финансирање по најповолни услови. Со Законот е предвидено РС Македонија да има пристап до 530 милиони евра, од кои до крајот на годината треба да се повлечат 110 милиони евра, а наредната 155 милиони евра. Тоа се средства потребни за справување со последиците од енергетската криза и поддршка на граѓаните и стопанството, кои се најпотребни во претстојната зима“, истакна министерот Бесими и додаде дека токму затоа е потребно законското решение да ја добие поддршката во Собранието.
Министерот потенцира дека Инструментот за претпазливост и ликвидност е воспоставен во 2011 година и е наменет за земјите членки на Меѓународниот монетарен фонд – ММФ со здрави основи и политики и докажана практика за имплементација на политиките и кои во даден момент може да имаат и потреба од финансирање поради одредени ризици што би можеле да доведат до таква потреба.
Целта, како што додаде министерот, на оваа кредитна линија е да обезбеди ефективна заштита од кризата за оние земји членки на ММФ што имаат здрави економски основи, односно политики.
„За да може една земја да се квалификува да го користи овој Инструмент е да има здрави економски основи и институционални рамки на политики; да имплементира и да има докажана практика на имплементирање здрави политики; и да остане посветена на одржување на таквите здрави политики во иднина.
Според министерот, целите за кои се наменети средствата и условите под кои се обезбедуваат се аргумент за да биде поддржано ова законско решение и средствата да може да станат достапни на земјата која се соочува со голем шок предизвикан од глобалната енергетска и ценовна криза.
Одборот на ММФ треба да ги одобри средствата до крајот на овој месец. Предвидено е да се користат во наредните 24 месеци. Рокот на отплата на средствата што ќе се повлечат е утврден на три години и три месеци од нивното повлекување. Каматната стапка по која се обезбедуваат средствата во овој момент изнесува од 3,66% до 4,66%.
Ова е само еден од начините на кој оваа година се обезбеди финансирањето на буџетскиот дефицит. Моделот што се примени од страна на Министерството за финансии и Владата овозможи заштеда само по основ на камата од 40 милиони евра годишно.
Оваа вест е достапна и на:
