Платeжната агенција преку која ќе се реализираат ИПАРД средствата во Македонија денеска доби акредитација од Европската комисија, соопшти Министерството за финансии.
 
Европска акредитација добија и Националниот координатор за авторизација и Националниот фонд при Министерството за финансии, Оперативната структура за рурален развој сочинета од Телото за управување во рамки на Министерството за земјоделство, шумарство и водостопанство, како и Ревизорското тело од Државниот завод за ревизија.
 
Со тоа, на сите овие структури им се овозможува целосно децентрализирано управување со ЕУ фондовите од петтата компонентата од Инструментот за претпристапна помоп (ИПА) – Рурален развој.
 
– Со доделување на акредитацијата, Европската комисија и одаде признание на македонската Влада за направениот напор за воспоставување на структурите за целосно децентрализирано управување со ИПА помошта во државната администрација во рамки на оваа Компонента, како и воспоставување целокупната правна рамка за правилно и ефикасно трошење на доделената помош од страна на Европската унија, наведува Министертсвото.
 
Согласно Оперативната програма за рурален развој од 2007-2012 Македонија има на располагање 62,5 милиони евра ИПАРД средства. Владата ќе обезбеди дополнително учество од 25 отсто како задолжително национално кофинансирање.
 
Целта на ИПАРД Програмата е да се подобрат конкурентноста на земјоделското производство, земјоделско-прехранбениот сектор и квалитетот на животот на руралната популација преку нивно усогласување со ЕУ стандардите, како и постигнување одржлива животна средина и социо-економски развој на руралните средини преку поттикнување на економска активност и зголемување на можностите за вработување.
 
Проектите што ќе бидат финансирани со ИПАРД програмата се однесуваат на инвестиции во земјоделските стопанства за нивно преструктуирање и надградба, преработка и маркетинг на земјоделски и рибни производи и диверзификација и развој на рурални економски активности, согласно стандардите на ЕУ.
 
По поднесеното барање за акредитација и спроведените ревизорки мисии, се очекува Европската комисија да им додели акредитација и на структурите за децентрализирано управување со ЕУ фондовите од првата ИПА компонентата – Помош во период на транзиција и институционална надградба.(МИА)
