Македонија ја интензивира соработката со Европската инвестициска банка. Покрај двата проекта во кои е вклучена банката, во наредниот период се очекува поддршка на проекти во инфраструктурата, енергетиката, патната инфраструктурата, како и развој на човечкиот капитал.
 
Ова го соопштија вицепремиерот и министер за финансии Зоран Ставрески и потпретседателот на ЕИБ Дарио Сканапиеко, по денешната средба во Скопје.
 
ЕИБ ќе финансира дел од проектот за гасификација на Македонија, патниот правец Демир Капија – Смоквица, железничката пруга кон Бугарија, втората и третата фаза од хидросистемот Злетовица, во обновливи извори на енергија, а договорено е да се направи и надополнување на кредитната линија од 100 милиони евра наменета за мали и средни претпријатија, одобрена минатата година за подобрување на ликвидноста претприајтијата поради светската економска криза.
 
Сканапиенко посочи дека Европската инвестициска банка сака да ја зајакне соработката со Македонија и финансиската поддршка.
 
– ЕИБ нема горна линија за висината на средствата кои би ги одобриле, но ако проектите се добри ќе ги финансираме, рече Сканапиеко.
 
Тој изрази задоволство од финансиската дисциплина на земјата во време на криза, како и капацитетот да размислува на долгрочни цели во време на криза, како и од реализацијата на кредитната линија од 100 милиони евра и рече дека поддршката на мали и средни претпријатија како стожер на економијата и создавачи на нови работни места ќе продолжи.
 
Европската инвестициска банка наскоро треба да даде одобрение за финансирање на коридорот К-10, односно патниот правец Демир Капија-Смоквица, како и за изработка на физибилити студија за железничката пруга кон Бугарија и проектот за гасификација на Македонија.
 
Минситерот за финансии Зоран Ставрески посочи дека средствата за гасификација ќе се определеат по изработката на физибилити студијата. Рамковно, додаде тој, се определени, но верификација треба да направат финансиските институции кои би биле вклучени во финансирањето, односноа ЕИБ и ЕБОР.
 
Ставрески се заблагодари што ЕИБ во овие две години на Македонија и даде поддршка со 150 милиони евра во два проекта и додаде дека постои заемна желба за интензивирање на сроаботката.
 
Од 1998 година ЕИБ во Македонија има инвестирано вкупно 330 милиони евра во разни проекти.
