Скопје, 21 август 2019 (МИА) – Градежната комора на Македонија го поддржува проектoт „Купи куќа, купи стан“ од почетокот на неговата промоција и смета дека со новите услови дополнително ќе се стимулира продажбата на нови станови за млади луѓе. Воедно, ќе се поддржи порастот во градежниот сектор во делот на високоградба преку изградба на нови станбени единици, задржување на постојните и генерирање нови вработувања, а тоа пак ќе доведе до пораст на целокупната економија.
Ова на денешната прес-конференција го соопшти претседателот на Градежната комора на Македонија Ивица Јаќимовски. Тој посочи дека од овој проект корист ќе имаат и компаниите преку зголемената продажба на изградени висококвалитетни и енергетски ефикасни станови, и младите луѓе кои, како што рече, со многу поволни услови ќе можат да дојдат до нов стан.
Заменик-министерката за финансии Ширет Елези информира дека пристапиле кон подобрување на моделите за „Купи куќа, купи стан“.
– Анализите покажаа дека поради поедноставената постапка, младите повеќе се заинтересирани за купување стан, особено оние што немаат почетен капитал или земјиште. Со цел да им ја обезбедиме потребната поддршка, креиравме нов модел „Купи стан за млади“. Согласно со новите подобрени услови, младите до 35 години ќе добијат до 70 отсто субвенции од државата, значи се зголемува учеството на субвенцијата и на ратата, рече Елези во Сојузот на стопански комори на Македонија.
Наведувајќи пример, таа рече дека ако кредитот е во износ од 50 илјади евра, граѓаните ќе добијат околу 11.900 евра од субвенцијата на ратата, а ако пак се одлучат за субвенција на учеството ќе добијат 8.750 евра. Елези потенцира дека каматните стапки за субвенциониран станбен кредит се едни од најниските што се нудат моментално.
Воедно посочи дека граѓаните дополнително можат да аплицираат и за субвенциониран станбен кредит со намалени каматни стапки. Каматната стапка за моделот „субвенција на рата“ за првите три години е намалена од првичните 3,9 на 2,9 отсто, а за третата и за четвртата година изнесува 3,9 проценти. Намалена е и каматната стапка за моделот „субвенција на учество“. Таа изнесува четири отсто за цело времетраење на исплатата на кредитот зголемена за шестмесечен еурибор.
– Дополнително, корисниците на субвенциониран станбен кредит, за секое новородено или посвоено дете, во текот на отплатата на истиот ќе добијат дополнителна едногодишна субвенција на месечната рата во висина од 30 проценти, рече Елези.
Таа информира дека граѓаните што имаат над 35 години и сакаат да изградат или да купат куќа, ќе добијат субвенции од 80 отсто од месечната рата во првите пет години или 80 проценти од учеството.
Заменик-министерката Елези нагласи дека добиле уверување од Градежната комора дека има веќе готови станови како и станови што се во градба, со цена до 900 евра за метар квадратен со вклучен ДДВ.
Министерството за финансии изготви прирачник за проектот „Купи куќа, купи стан“, кој е поставен на веб-страницата на Министерството. За неполни три месеци откако стапија на сила новите услови, интересот кај граѓаните е голем.
Оваа вест е достапна и на:
