6 април 2021, Скопје – Инвестициите во развојот на човечкиот капитал се од исклучителна важност за напредокот на државата, а особено во секторите образование, здравство и социјална заштита. Како се справуваат земјите со последиците од кризата предизвикана од пандемијата на ковид-19 и нејзините удари врз здравството, образованието, ранливите категории граѓани и работните места, градењето одржливи и инклузивни системи отпорни на идни шокови, промовирањето економски можности и истовременото обезбедување фискална одржливост, беа темите на кои дискутираа министрите за финансии и развој од различни земји во светот, заедно со потпретседателот на Светска банка за развој на човечки капитал, Манта Мурти и претседателот на Групацијата Светска банка, Дејвид Малпас.
Активно учество и обраќање имаше министерот за финансии на РС Македонија, Фатмир Бесими, којшто ја нагласи поддршката на Владата и Министерството за финансии во инвестициите за развој на човечкиот капитал, за што зборува и приклучувањето на земјата кон проектот „Човечки капитал“ на Светска банка.
– Реформите во здравството, образованието и социјалната сфера се отпочнати, но исто така ни претстои голема работа по однос на истите. Од аспект на финансирањето во овие сектори, предвидени се зголемени средства како дел од БДП, истовремено имајќи ја предвид и ефикасноста на овие инвестирања. Реформите што ги отпочнавме во соработка со Светска банка овозможија пoефективна државна интервенција при справувањето со последиците од кризата, притоа олеснувајќи ги каналите на дистрибуција на јавните услуги. Ние продолжуваме со овие клучни реформи, коишто се основа за понатамошен раст и развој – истакна министерот Бесими.
Бесими потенцира дека активно се работи на мерки и активности што ќе придонесат за унапредување на развојот на човечките ресурси, како еден од столбовите на коишто се темели Стратегијата за финансирање забрзан раст.
– Мерките и активностите што се носат со цел унапредување на образованието, науката и здравството, поголема активност на работоспособното население, како и мерките за зголемување на социјалната заштита ќе го подобрат квалитетот на живот на нашите граѓани – истакна министерот.
Оваа вест е достапна и на:
