27 септември 2021, Скопје – Министерот за финансии Фатмир Бесими денеска оствари средби со претставници на Стопанската комора на Северна Македонија, Сојузот на стопански комори на Македонија, Стопанската комора на Северозападна Македонија и МАСИТ. Средбите се дел од континуираниот дијалог што Министерството за финансии ги има со бизнис-заедницата во насока на размена на мислења и преземање мерки за создавање подобри деловни услови и забрзан раст.
Денеска на средбите беа презентирани препораките што произлегоа од Конференцијата што ја организираше Министерството за финансии во рамки на Економскиот и финансиски форум, а кои треба да бидат усвоени од Владата и се дел од Планот за финансирање на заздравувањето и забрзан економскиот раст којшто е во завршна фаза на подготовка во Министерството за финансии и којшто беше дискутиран и на средбите.
„Во насока на заложбите за фискална консолидација, а воедно и заложбите за двојно зголемување на економскиот раст и постигнување повисоки годишни стапки на раст на БДП од околу 5%, во Министерството за финансии е подготвен Планот за финансирање на заздравувањето и забрзан економски раст. Овој план дава одговор за нови начини на пристап до капитал за финансирање на заздравувањето и забрзувањето на економскиот раст, преку проекти во јавниот и приватниот сектор“, рече министерот за финансии пред стопанствениците.
Тој додаде дека целта на Планот е да се зголемат вкупните инвестиции во економијата, а притоа да се остане на зацртаниот курс – постепено да се намалува фискалниот дефицит, а со тоа и да се задржи долгот на стабилно ниво.
„Главната поента на овој план е преку креирање и користење нови механизми, инструменти, фондови и извори на финансирање да се создаде позитивен мултипликативен ефект, односно покрај планираните јавни инвестиции во износ од 4 милијарди евра за периодот 2022-2026 година, финансирани од Буџетот, ИПА фондовите и меѓународните финансиски институции, да се мобилизираат повеќе средства и инвестиции од приватниот сектор. Со тоа, ќе се зголемат и вкупните инвестиции и ќе се забрза растот на Бруто-домашниот производ и отворањето нови работни места“, потенцира министерот.
Планот се состои од креирање развојни фондови, фондови за поддршка на иновации, гарантни фондови, развојни и проектни обврзници, фондови за ризичен (venture) капитал и слични инструменти за поддршка на извозни компании, мали и средни претпријатија, како и претпријатија со висока општествена одговорност. Се планираат јавни приватни партнерства, концесии и други инструменти за финансирање јавни капитални проекти, како и проекти на приватниот сектор.
Планот за финансирање на заздравувањето и забрзан економски раст предвидува поддршка на проекти во јавниот и приватниот сектор кои ќе придонесат за подобрување на конкурентноста на економијата и подобрување на квалитетот на животот, односно ќе опфаќаат области од животната средина, дигитализацијата, иновациите, човечкиот капитал и општествената инклузивност. Имплементатори ќе бидат Развојната банка, Фондот за иновации и технолошки развој, Дирекцијата за технолошки индустриски зони и други институции со вклученост на комерцијалните банки и инвестициските фондови.
„Целта и очекуваните резултати од Планот за финансирање на заздравувањето и забрзан економски раст се финансирање на заздравувањето на економијата погодена од кризата предизвикана од КОВИД-19 и поддршка на забрзан и одржлив раст, а притоа одржување фискална стабилност преку мобилизирање капитал од приватниот сектор, како дополнување на финансиските средства издвоени од Буџетот. Очекувани резултати од Планот на среден рок се: двојно зголемување на економскиот раст од просечната стапка на раст од 2,5% во изминатата декада на стапка од 5%; зголемување на инвестициите во јавната инфраструктура, како и зголемување на инвестициите кај приватниот сектор преку механизам на мултипликација на финансиите со приватни покрај јавните извори на финансирање; одржување фискална стабилност во рамките на Мастришките критериуми за јавен долг и буџетски дефицит. Следствено, инвестициите и забрзаната динамика на раст ќе придонесат за зголемена вработеност и подобрување на стандардот и квалитетот на живот на граѓаните“, потенцира министерот Бесими на средбите со бизнис-заедницата, напомнувајќи дека за годинава проектираниот раст на БДП е 4,1 %, но оти движењата во економијата и постигнатиот раст на БДП во вториот квартал од 13,1 отсто упатуваат на тоа дека може да се надмине проекцијата. Во наредните години се очекува интензивирање на економскиот раст, односно во 2022 година враќање на преткризното ниво и натамошно постепено забрзување.
Покрај Планот, се финализираат и Предлог-мерките за фискална консолидација и за поддршка на растот и развојот и новата Програма на економски реформи.
Оваа вест е достапна и на:
