29 ноември 2023, Скопје – Исполнувањето на политичкиот договор за поставување премиер Албанец во предизборниот период е инвестиција во заедничката иднина и конкретен одговор на сите предрасуди што нѐ следат од минатото, истакна министерот за финансии, Фатмир Бесими во интервју за Телевизија 24. Тој посочи дека тоа не е само предизборно ветување, туку градење на меѓусебната доверба, зацврстување на темелите на една заедничка држава, преземање одговорност и порака за еднаквост и еднакви можности. Тоа е следење и на европските вредности, мултиетничко, мултикултурно општество, со меѓусебно разбирање и толеранција, кое функционира во интерес на обезбедување просперитет и подобар животен стандард за сите граѓани.
„Македонија е во фаза кога веќе има отворено преговори за членство во ЕУ. Таа е членка во НАТО, ние учествувавме во различни мисии на сојузниците и пред членството, во Авганистан, Кабул, рамо до рамо со американските војници како еднакви. Нашите војници беа во обезбедувањето на главниот штаб на НАТО. Што беше главната порака при мојата посета таму како министер за одбрана? Американскиот генерал истакна дека тој „им верува на нашите војници“. Тоа е она што ние го правиме на меѓународно ниво, а треба да го направиме и тука во зајакнување на меѓусебната доверба. Значи инвестиција во доверба и преземање одговорност“, посочи Бесими.
Во однос на прашањето дали тој е едно од кадровските решенија за премиер, министерот рече: „Секој граѓанин треба да знае дека без разлика на етничката припадност, кој и да биде премиер во Владата на нашата земја, тој ќе биде премиер за сите граѓани. Така што, од тој аспект, сигурно ќе биде некој што компетентно ќе ја заврши работата. Јас ниту сум размислувал, ниту сега размислувам за тоа, во оваа фаза мојот единствен фокус е справувањето со економско-финансиските предизвици кои се во моја надлежност како министер за финансии“.
Оваа вест е достапна и на:
