31 март 2025, Скопје – На 1 април 2025 година, Бирото за јавни набавки ќе ја стави во функција новата надградена верзија на Електронскиот систем за јавни набавки, со нови функционалности и напредни алатки со што ќе се олесни работењето и на набавувачите и на понудувачите.
„Станува збор за значајна реформа која ќе го унапреди процесот на јавните набавки, ќе ја зголеми транспарентноста и ефикасноста на целиот процес, а поедноставената и стандардна документација отвора можност за учество на повеќе компании во овој процес, а оттука и зголемена конкурентност. Со новата верзија се воведуваат иновативни технологии кои ќе генерираат напредна аналитика на податоци со што ќе се постигне поголема отчетност при трошењето на јавните средства“, изјави министерката за финансии Гордана Димитриеска-Кочоска.
Новите алатки овозможуваат и придонесуваат за усогласување со стандардите и регулативата на ЕК и претставуваат исчекор во востановувањето на ЕСЈН како официјален член (e-Sender) на платформата на ЕУ за објавување тендери – ТЕД, а воедно со нив се имплементира процес на автоматско креирање тендерска документација, со што значително ќе се подобри квалитетот на тендерските документации, ќе се намалат грешките и пропустите, а со тоа ќе се намали и поништувањето на постапките. Паралелно, ќе се скрати и времето за учество на постапките и ќе се постигне поголема сигурност и интегритет во креирањето на понудите.
Воведувањето на алатката за структурирање на финансиската понуда на компаниите, која ќе доведе до поголема транспарентност и полесно следење на цените, ќе овозможи подобар мониторинг и подетална анализа на цените на понудите и вредноста на договорите за јавни набавки, споредба на единечни цени на ист предмет на набавка со други институции, споредба со цени од претходни години и сл. Со ова ќе се добие увид во генералните движења на цените на производите и услугите на пазарот за јавни набавки, компаративна анализа, проектирање трендови итн.
Целокупната надградба на системот, покрај горенаведените бенефити и подобрувања, претставува основа за следната поголема реформа во работењето на јавниот сектор, како што е воведување унифицирана е-фактура за јавни набавки во соработка со Управата за јавни приходи.
Тимот на Бирото за јавни набавки, предводен од директорката Маре Богева Мицовска, останува посветен на континуирано подобрување на системот на јавните набавки на сите полиња, како во делот на воведување иновативни електронски алатки, така и во зајакнувањето на интегритетот и довербата во постапките за јавни набавки.
Last modified: април 2, 2025
