7 јули 2023, Скопје – Министерот за финансии, Фатмир Бесими се вклучи во процесот на издавање на граѓанската обврзница со симболично купување на една граѓанска обврзница. Ова го објави на својот фејсбук-профил наведувајќи дека со оваа инвестиција придонесуваме за развојот на земјата, вложуваме во развојни проекти коишто се финансираат од Буџетот, а се во интерес на економијата и на граѓаните.
„Поднесов барање до банката за купување хартии од вредност – граѓанска обврзница. Банката ќе ме извести за резултатот од аукцијата што ќе се одржи на 13 јули 2023 година, а сопственоста на граѓанските обврзници ќе се евидентира во Депозитарот за хартии од вредност на 20 јули 2023 година“, напиша министерот на својот фејсбук-профил.
Посочувајќи дека оваа инвестиција од 10.000 денари две години по ред ќе му донесе принос од по 500 денари, и тоа на 20 јули 2024 година и на истиот датум во 2025 година кога ќе му биде вратена и вложената вредност од 10.000 денари, ги повика и граѓаните да бидат дел од овој важен процес за земјата, кој, како што наведува, им нуди лична благосостојба со сигурни и поволни инвестиции.
Министерот истакна дека со цел да избегне каков било конфликт на интереси, поради неговата јавна должност како министер за финансии и со овластувања за одлучување при издавање хартии од вредност со цел финансирање на Буџетот, нема да учествува со дополнителни инвестиции во граѓански обврзници додека ја извршува оваа јавна должност.
