21 април 2021, Скопје – Во време во кое се соочуваме со најголемата економска криза од изминатото столетие, од особена важност за заздравување на економијата е да се креира синергија, односно да се инвестира во „зелени проекти“, коишто истовремено ќе имаат позитивен ефект и врз економскиот развој и врз животната средина. Ова го истакна министерот за финансии, Фатмир Бесими, кој денеска заедно со претставникот на Европската банка за обнова и развој (ЕБОР), Анди Аранитаси и градоначалникот на град Скопје, Петре Шилегов го потпишаа договорот за финансирање на проектот „Брз автобуски превоз“ (Bus Rapid Transport) во вредност од 70 милиони евра. На настанот присуствуваше и министерот за транспорт и врски, Благој Бочварски.
– Кога иницијативите за создавање „зелена“, поинклузивна и одржлива економија ќе се совпаднат со напорите за економско заздравување од корона-кризата, придобивките за македонската економија се повеќекратни. Во оваа и во следните години ќе инвестираме во проекти, коишто ќе придонесат за заштита на животната средина, ќе го олеснат транспортот, ќе придонесат за заштеда на време и енергетски ресурси, ќе овозможат раст на инвестициите и работните места и ќе донесат подобрување на квалитетот на животот на нашите граѓани. Како министер за финансии ја поддржувам меѓународната соработка, којашто ќе ја помогне т.н. „зелена транзиција“, а овој проект е дел од тој поширок план. Сегашните и идните генерации треба и мора да имаат можност да дишат почист воздух и да патуваат побрзо и побезбедно – рече Бесими.
Проектот опфаќа воспоставување две линии за автобуски превоз со коридори коишто се резервирани само за автобусите и тоа од Ѓорче Петров во Ново Лисиче, и од Бутел до Кисела Вода. Трасата од Ѓорче до Ново Лисиче ќе биде во должина од 12,80 километри во една насока, ќе има 21 станица, два терминала во иднустриската зона во Ѓорче Петров и во населбата Ново Лисиче, каде што ќе биде изграден новиот терминал.
Според првичните процени, вкупниот број патници што ќе ја користат оваа траса е околу 65 илјади луѓе дневно. Со имплементација на првата фаза се очекува времетраењето на патувањето од сегашните 70 минути да се намали за повеќе од 50 проценти.
Заемот од ЕБОР од 70 милиони евра ќе биде во две транши. Првата транша во износ од 47,6 милиони евра е за финансирање на линијата 1, односно исток – запад, а втората транша во износ од 22, 4 милиони евра за финансирање на линијата 2, односно југ – север.
Оваа вест е достапна и на:
