Лондон, 10 ноември 2015 (МИА) – Македонија доби дополнителни 21 милион евра од Европската банка за обнова и развој (ЕБОР), со кои се овозможува, наместо реконструкција на постоечкиот, изградба на нов експресен пат од Штип до Кочани. Договорот денес во Лондон го потпишаа вицепремиерот и министер за финансии Зоран Ставрески, првиот потпретседател на Банката Фил Бенет и директорот на Јавното претпријатие за државни патишта Александар Стојанов.
Експресниот пат ќе биде со должина од 28 километри и ќе има четири ленти. Со тоа ќе се зголеми безбедноста во сообраќајот, а ќе се влијае и на заштита на животната средина. Треба да почне да се гради во првиот квартал следната година.
– Во Лондон го потпишавме договорот со Европската банка за обнова и развој за финансирање нов експресен пат од Штип до Кочани. Вредноста на проектот е 53 милиони евра кои ќе овозможат да се изгради целосно нов експресен пат со четири ленти во должина од 28 километри кој ќе ги поврзува Штип и Кочани. На тој начин, со изградба на модерен пат кој ќе обезбеди побезбедно и побрзо патување помеѓу овие два града, им излегуваме во пресрет на граѓаните на Штип, на Кочани и на другите населени места. Истовремено ќе се овозможи и подобрување на конкурентноста во регионот, како и да се привлечат нови инвеститори кои ќе го користат овој пат, изјави Ставрески по потпишувањето на Договорот.
Тој додаде дека изградбата на регионалниот пат од Штип до Кочани се вклопува во агендата на Владата на РМ за интензивна изградба на регионални патишта од кои, пак, како што рече, ЕБОР ја поддржува и изградбата на патот од Раевци до Дреново која, исто така, ќе започне набрзо, како и изградбата на патот од Охрид кон Пештани и од Требеништа до Струга.
– Соработуваме и во делот на железничката инфраструктура каде со средства на ЕБОР се поддржува изградбата на пругата кон Бугарија, а очекуваме и поддршка во енергетскиот сектор, рече Ставрески и додаде дека на ваков начин се заокружуваат крупни транспортни проекти со кои се подобрува конкурентноста на македонската економија.
Се заблагодари на поддршката на ЕБОР која во Македонија во изминатиот период изнесува вкупно 1,5 милијарди евра од кои голем дел се средства за транспортната инфраструктура, изградба на железницата и поддршка на приватниот сектор.
Фил Бенет, по потпишувањето на Договорот за ЕБОР, рече дека клучен приоритет во Македонија е развој на инфраструктурата. – Добро развиени и современи регионални транспортни конекции ќе го зајакнат регионот и ќе го подобрат пристапот на оддалечените области до поголемите пазари. Во прилог на ова, подобрениот дизајн на продолжувањето на патот ќе резултира во значајно зголемување на безбедноста, истакна Бенет.
ЕБОР почна да инвестира во македонската економија во 1993 година. До денес, во земјата има потпишано над 90 проекти.
Оваа вест е достапна и на:
