22 gusht 2026, Shkup - Pas miratimit të Ligjit të ri të Lojërave të Fatit, vazhdojmë me zbatimin e tij dhe rregullimin e mëtejshëm duke miratuar një nga rregulloret e nevojshme - Rregullore për përcaktimin e reputacionit, integritetit dhe burimin e mjeteve për organizimin e lojërave të fatit - akt që përshkruan në detaje dokumentacionin e nevojshëm për konfirmimin e reputacionit të personave juridikë dhe fizikë që parashtrojnë kërkesë për licencë për kazino, bastore, klub me automat ose tombolë të llojit të mbyllur", deklaroi ministrja e Financave Gordana Dimitrieska-Koçoska në një postim të saj në Facebook.
Ajo sqaron se dokumentacioni i nevojshëm, ndër të tjera, i referohet sanksioneve të shqiptuara për ndalimin e ushtrimit të profesionit, gjobave të shqiptuar për ndalimin e organizimit të lojërave të fatit dhe rrethanave të ngjashme që janë të rëndësishme për pjesëmarrjen e tyre në organizimin e lojërave të fatit.
Ky është hap i rëndësishëm, sepse Rregullorja i shndrron parimet ligjore në rregulla, procedura dhe kritere konkrete të cilat mund të zbatohen në praktikë“, theksoi ministrja.
Ajo shton se Ministria e Financave po punon edhe për përgatitjen dhe miratimin e rregulloreve të tjera të nevojshme për implementimin e plotë të ligjit.
“Rregullativa precize dhe e qartë është baza për rregulla të qarta dhe të drejta të funksionimit në çdo industri, përfshirë edhe industrinë e lojërave të fatit. Për ne, miratimi i ligjit dhe i akteve nënligjore nuk është fund i procesit. Rezultati i vërtetë vjen me implementimin e tij konsekuent. Prandaj, çdo rregullore e miratuar dhe çdo hap i mëtejshëm në zbatimin e saj nënkupton që zgjidhjet ligjore po bëhen realitet, ndërsa zbatimi i tyre sjell mbrojtje më të madhe për qytetarët dhe sistem më efikas”, theksoi ministrja e Financave, Gordana Dimitrieska-Koçoska.
Ministrja rikujtoi se Ligji i ri i Lojërave të Fatit dhe Lojërave Argëtuese u miratua në fund të qershorit të këtij viti, me arsyetimin se kjo fushë ka ndryshuar në mënyrë të konsiderueshme vitet e kaluara. Me ligjin e ri futen më shumë risi, qëllimi i përbashkët i të cilave është mbrojtja më e madhe e qytetarëve, kontrolli më i fuqishëm dhe funksionimi më i përgjegjshëm në këtë industri.
Ashtu siç theksohet në postim, ishte e nevojshme kjo rregullativë bashkëkohore e cila do t’u përgjigjet sfidave të reja dhe do të sigurojë mbrojtje më të madhe të qytetarëve si dhe mbikëqyrje më efikase.
