Ribalanci i Buxhetit është hartuar me fokus të qartë në ruajtjen e disiplinës fiskale, përkrahjen e projekteve prioritare dhe rishpërndarjen efikase të mjeteve buxhetore, theksoi ministrja e Financave Gordana Dimitrieska-Koçoska në intervistën për Televizionin Sitel.
“Pjesa më e madhe e shkurtimeve janë bërë në kuadër të Qeverisë së Republikës së Maqedonisë. Kemi siguruar 800 milionë denarë mjete shtesë për paga, pjesa më e madhe e të cilave është për Ministrinë e Punëve të Brendshme, respektivisht 600 milionë denarë nga llogaria e buxhetit dhe 400 milionë denarë nga mjetet vetanake në buxhetin e tyre. Kjo mundëson rritjen e pagave në Ministrinë e Punëve të Brendshme për 10%, ku vlera e përgjithshme arrin rreth 1 miliard denarë”, potencoi ministrja dhe shtoi se në fushën e sigurimeve sociale, janë siguruar 2.5 miliardë denarë mjete shtesë për pagesën e pensioneve.
Ministrja potencoi se ka rritje të mjeteve në Ministrinë e Mbrojtjes, si institucion me nivelin më të lartë të realizimit të shpenzimeve kapitale, me ç’rast janë ndarë mjete shtesë prej 1 miliard denarësh.
“Kemi edhe rritje të buxhetit për Ministrinë e Politikës Sociale, Demografisë dhe të Rinjve ku janë siguruar edhe 300 milionë denarë për organizatat joqeveritare për shërbimet lidhur me personat e moshuar dhe personat që kanë nevojë për përkujdesje. Në mënyrë shtesë, janë siguruar mjetet e anëtarësimit në organizatat ndërkombëtare përmes buxhetit të Ministrisë së Punëve të Jashtme”, shtoi ministrja.
Ajo informoi se me Ribalancin e Buxhetit janë rritur mjetet për investimet kapitale edhe përkundër realizimit të dobët të disa institucioneve që nga fillimi i vitit.
Ashtu siç sqaroi ministrja, në bisedimet me ministritë kompetente është insistuar për të dhëna konkrete sa i përket marrëveshjeve të lidhura, dinamikën e realizimit dhe afatet kohore. Mjete shtesë janë ndarë vetëm aty ku nuk ka pasur bazë reale dhe shkallë të lartë të realizimit.
