Кumtesa|

30 janar 2022, Shkup – Ministria e Financave nesër dhe pasnesër (31 janar dhe 1 shkurt) do të jetë nikoqire e delegacionit qeveritar nga Republika e Bullgarisë e kryesuar nga ministri i Inovacionit dhe Rritjes, Daniel Lorer, i cili së bashku me ministrin e Financave, Fatmir Besimi do të bashkëkryesojë takimin e parë të grupit të punës për Ekonomi, Tregti dhe Inovacion.

Gjatë takimit në Shkup, grupi i punës do të shqyrtojë mundësitë për tërheqjen e investimeve, mundësitë e inovacionit, financimin e projekteve, rritjen e shkëmbimit tregtar ndërmjet dy vendeve, si dhe prioritetet për zhvillimin e rajonit, sferat në të cilat mund të zhvillohen projekte të përbashkëta dhe të ngjashme.

Pjesëmarrësve do t’u prezantohet Plani për rritje të përshpejtuar ekonomike me rishikim të instrumenteve financiare, programet strategjike për inovacion, politikë industriale dhe konkurrencë, prezantime mbi punën e fondeve të inovacionit dhe zhvillimit teknologjik të të dyja vendeve, punën e Këshillit nacional start-up, si dhe programet e punës dhe mundësitë që ofrojnë bankat zhvillimore të dy vendeve, Agjencia Ekzekutive për Promovimin e Ndërmarrjeve të Vogla dhe të Mesme nga Republika e Bullgarisë dhe Agjencia për Promovimin e Sipërmarrjes në Republikën e Maqedonisë së Veriut, si dhe programet e zhvillimit rural të RMV-së dhe Republikës së Bullgarisë.

Grupi ndërqeveritar i punës u formua javën e kaluar në Sofje gjatë mbledhjes së përbashkët ndërqeveritare. Grupi i punës gjatë takimit në Sofje përcaktoi prioritetet e punës dhe dinamikën e mbajtjes së takimeve, sipas të cilave do të mblidhet një herë në muaj. Aktivitetet e saj do të synojnë përforcimin dhe intensifikimin e bashkëpunimit ekonomik në sferën e tregtisë, investimeve, inovacionit, financave dhe pjesëmarrjes së përbashkët në programet dhe fondet e BE-së, si dhe bashkëpunimin me odat ekonomike.

Në këtë takim, nga pala maqedonase, do të marrin pjesë edhe zëvendëskryeministri për Çështje Ekonomike, Fatmir Bytyqi, ministri i Financave, Fatmir Besimi, ministri i Ekonomisë, Kreshnik Bekteshi, zëvendësministri i Bujqësisë, Pylltarisë dhe Ekonomisë së Ujërave, Trajan Dimkovski, si dhe drejtori i Bankës Zhvillimore të Maqedonisë së Veriut, Kire Naumov, drejtori i Fondit për Inovacion dhe Zhvillim Teknologjik, Festim Halili dhe drejtori i Agjencisë për Investime të Huaja, Bekim Emini. Ndërsa si pjesë e delegacionit nga Republika e Bullgarisë, që do të marrin pjesë në këtë takim, janë ministri i Inovacionit dhe Rritjes, Daniel Lorer, zëvendësministri i Financave, Andrej Cekov, zëvendësministri i Bujqësisë, Atanas Dobrev, drejtori i Agjencisë Ekzekutive për Promovim të Ndërmarrjeve të Vogla dhe të Mesme, Bojko Takov, drejtori i Bankës Bullgare për Zhvillim, Valentin Mihov dhe përfaqësues të tjerë të institucioneve.

Ky lajm është në dispozicion edhe në: Macedonian English

Leave a Reply

Your email address will not be published.

Close Search Window