13 tetor 2022, Washington – Zyra e Ndihmës Teknike të Thesarit të SHBA-së (OTA) është e gatshme ta përkrahë zhvillimin e kapaciteteve të menaxhimit me financat publike, si dhe luftën kundër ekonomisë gri dhe politikat kundër pastrimit të parave.
Kjo u diskutua në takimin ndërmjet ministrit të Financave, Fatmir Besimi dhe zëvendësndihmës sekretarit të Thesarit të SHBA-së për përkrahje teknike, William Larry McDonald në Washington.
Ministri Besimi, theksoi se Qeveria e Republikës së Maqedonisë së Veriut, gjatë viteve të fundit, punoi në mënyrë aktive mbi masat dhe planet e uljes së ekonomisë joformale, ku përfshihet edhe Plani aksional për luftën kundër ekonomisë gri, i cili u hartua nga Ministria e Financave.
Gjithashtu, Ligji i ri i Buxheteve është reformë kyçe që po zbatohet në financat publike, me qëllim të sigurimit të kornizës së udhëheqjes së politikës së mirëfilltë, të parashikueshme dhe të qëndrueshme fiskale. Në lidhje me këto aktivitete, domëthënëse do të jetë ndihma teknike e SHBA-së.
Njëherazi, gjatë takimit u diskutua edhe për mundësitë e thellimit të bashkëpunimit ekonomik dhe realizimit të projekteve të reja në bashkëpunim me USAID-in dhe Ambasadën e SHBA-së në vend.
Të dyja palët, u pajtuan se aktualisht çështja prioritare është ballafaqimi me krizën energjetike dhe të çmimeve, njëkohësisht duke ruajtur stabilitetin makroekonomik, me ç’rast në këtë drejtim është edhe pakoja e re e masave, e miratuar nga Qeveria.
Në kuadër të takimeve vjetore të FMN-së dhe Bankës Botërore, ministri Besimi do të zhvillojë takime edhe me drejtorin ekzekutiv të Bankës Botërore, Koen Davidse, zëvendësdrejtoren e Bankës Botërore, Anna Bjerde, si dhe me drejtorin ekzekutiv të FMN-së, Pol Hilbers dhe drejtorin e FMN-së për Evropën, Alfred Kamer.
Ky lajm është në dispozicion edhe në:
