10 korrik 2023, Shkup – Sot, në Ministrinë e Financave, Grupi i punës pas takimeve dhe diskutimeve intensive, përcaktoi modelin për rritjen e pagave të të punësuarve në administratën publike.
“Është arritur zgjidhje sistematike dhe e qëndrueshme për rritjen e pagave për të punësuarit në sektorin publik. Propozimi, të cilin e përcaktuam së bashku, me përfaqësuesit e sindikatave, do të dorëzohet në Këshillin Ekonomik dhe Social, i cili duhet të konfirmohet në seancë që do të mbahet në ditët vijuese.
Kjo është zgjidhje sistematike që siguron rritje të pagave prej 10% për të gjithë të punësuarit në sektorin publik, duke filluar nga paga për muajin shtator 2023, theksoi ministri Fatmir Besimi, i cili së bashku me zëvendëskryeministrin e Çështjeve Ekonomike, Fatmir Bytyqi dhe ministren e Punës dhe Politikës Sociale, Jovana Trenchevska ishin pjesë e grupit të punës.
Siç shtoi ministri, zgjidhja mbron interesat e të punësuarve, standardin, por njëkohësisht monitoron edhe produktivitetin e ekonomisë vendase.
“Më e rëndësishme është se po flasim për një zgjidhje të arritur përmes dialogut, ku krijojmë besim reciprok, zgjidhje që vendos një sistem afatgjatë dhe garanton rritjen e pagave për të gjithë të punësuarit në sektorin publik dhe mbrojtjen e standardit të qytetarëve”, theksoi ministri Besimi.
Krahas rritjes prej 10% të pagave që nga shtatori, gjatë bisedimeve u arrit edhe vendosja e metodologjisë së re të pagave me koeficient të bazuar në pagën mesatare bruto nga marsi i vitit 2025. Gjithashtu u dakordua që regresi për pushimet vjetore të paguhet në vlerë prej 10.000 denarëve neto për vitin 2023, ndërsa nga viti 2024 e tutje në Marrëveshjen e përgjithshme kolektive është rënë dakord që kjo vlerë të jetë së paku 30% nga paga mesatare neto.
Në mënyrë që të zbatohet ajo që u dakordua për muajin shtator, do të bëhet rishikimi i Buxhetit.
Dialogu për rritjen e pagave zhvillohet në kuadër të Këshillit Ekonomik dhe Social, ku në periudhën e kaluar në axhendë ishte nënshkrimi i Marrëveshjes së Përgjithshme Kolektive për të gjithë të punësuarit në sektorin publik, për vendosjen e një zgjidhjeje sistematike që do të vlejë për të gjithë në mënyrë të njëjtë.
Ky lajm është në dispozicion edhe në:
