5 октомври 2026, Скопје - Секторот Академија за јавни финансии при Министерството за финансии денеска, реализираше онлајн обука на тема „Управување со ризици“, наменета за вработените во јавниот сектор, со цел унапредување на нивните стручни знаења и практични вештини за идентификување, проценка и управување со ризиците во работењето на институциите.
Во рамки на обуката, на која обучувач беше Мите Митевски, раководител на Секторот за централна хармонизација на системот на внатрешна финансиска контрола во јавниот сектор, беа презентирани клучните принципи и фази на процесот на управување со ризици, со посебен акцент на навременото идентификување на ризиците, нивната анализа и проценка, како и утврдувањето и следењето на соодветни мерки за нивно управување.
Учесниците се запознаа со практични аспекти на управувањето со ризици и со значењето на воспоставувањето соодветни механизми во институциите, преку кои ризиците можат навремено да се препознаат, проценат и соодветно да се адресираат. Притоа, беше истакната важноста од интегрирање на управувањето со ризици во процесите на планирање, донесување одлуки и остварување на целите на институциите.
Ефикасното управување со ризици е важен дел од системот на внатрешна финансиска контрола и придонесува кон подобрување на работењето на институциите, зајакнување на одговорноста и отчетноста, како и поефикасно користење на јавните ресурси. Навременото препознавање на потенцијалните ризици овозможува институциите да преземат соодветни активности и да го намалат нивното можно влијание врз остварувањето на поставените цели.
Преку реализацијата на ваквите обуки, Академијата за јавни финансии продолжува со своите активности за јакнење на професионалните капацитети во јавниот сектор и создавање услови за континуирано унапредување на знаењата и компетенциите на вработените.
Особено значење се посветува на развојот на знаења и вештини во областите кои имаат директно влијание врз квалитетот на управувањето со јавните средства, финансиската одговорност, транспарентноста и ефикасноста на институциите.
Обуката „Управување со ризици“ е дел од програмските активности на Академијата за јавни финансии за континуиран професионален развој и унапредување на системот на јавни финансии.
Академијата за јавни финансии и во наредниот период ќе продолжи со реализација на стручни обуки и активности за развој на професионалните капацитети на вработените во јавниот сектор, со цел придонес кон поефикасно, транспарентно, отчетно и одговорно управување со јавните средства.
