23 септември 2026, Скопје – Министерството за финансии спроведе значајна реформа за развој и унапредување на условите на пазарот на капитал усогласувајќи го домашното со европското законодавство. Ова го истакна заменик-министерот за финансии Николче Јанкуловски во обраќање на 25-тата Годишна конференција на Македонска Берза којашто се одржа во Охрид.
„Владата презема клучни активности насочени кон креирање долгорочно стабилен, сигурен и отпорен финансиски систем. Пазарот на капитал е витален сегмент на тој систем, а одржувањето на макроекономската и фискалната стабилност е основен предуслов за негов натамошен раст и развој. Како носител на законската регулатива, Министерството за финансии континуирано работи на унапредување на условите на пазарот и на усогласување на домашното со европското законодавство. Пазарот на капитал е дел од Кластерот „Внатрешен пазар“, во рамки на Поглавјето 9 за финансиски услуги, и во таа насока ги следиме новите европски директиви и регулативи“, рече Јанкуловски.
Тој потенцира дека една од најзначајните реформи во нашата агенда во оваа област спроведена преку носењето на Законот за финансиски инструменти и Законот за проспекти за хартии од вредност и обврски на издавачите за транспарентност, коишто го заменија Законот за хартии од вредност, а почнуваат да се применуваат од следниот месец.
„Со новата регулатива воспоставуваме модерна и сеопфатна рамка за македонскиот пазар на капитал, усогласена со ЕУ-регулативите. Создаваме услови за развој на нови производи и услуги, поголема стабилност, зајакнат надзор и повисоко ниво на заштита на инвеститорите“, посочи заменик-министерот и потсети дека паралелно со развојот на правната рамка направен и практичен исчекор со воведувањето на граѓанските обврзници.
Ваквите конференции се важни и за споделување на јавните политики. Преку дијалог меѓу креаторите на политики, меѓународните развојни партнери, бизнис-секторот и академската јавност создаваме простор за нови идеи и решенија за забрзан и одржлив економски раст.
