15 октомври 2026, Скопје - Заменик-министерот за финансии, Николче Јанкуловски, учествуваше на работилницата за валидација на резултатите од иницијативата BIOFIN – Финансии за биодиверзитет, организирана од Програмата за развој на Обединетите нации (УНДП), во партнерство со Министерството за финансии и Министерството за животна средина и просторно планирање.
Во фокусот на работилницата беа анализата на постојните расходи за биолошката разновидност, проценката на финансиските потреби и подготовката на Националниот план за финансирање на биолошката разновидност.
Јанкуловски го истакна значењето на поврзувањето на политиките за заштита на животната средина со буџетското планирање, ефикасното користење на јавните средства и обезбедувањето одржливи извори на финансирање.
„Заштитата на природата е инвестиција во иднината. Преку одговорно управување со јавните финансии, ефикасно користење на ресурсите и зајакната институционална соработка создаваме услови за одржливо финансирање и зачувување на природното богатство“, истакна Јанкуловски.
Министерството за финансии останува посветено на унапредување на буџетското планирање и меѓуинституционалната соработка во насока на интегрирање на приоритетите за заштита на биолошката разновидност во јавните политики и финансиските процеси.
На настанот се обратија и заменик-министерката за животна средина и просторно планирање, Ане Лашкоска и постојаниот претставник на УНДП, Армен Григоријан. На работилницата учествуваше и специјалниот советник на претседателот на Владата, проф. д-р Даме Димитриевски.
