15 октомври 2026, Скопје - Заменик-министерот за финансии, Николче Јанкуловски, учествуваше на работилница организирана во рамки на програмата СИГМА, заедничка иницијатива на Организацијата за економска соработка и развој (ОЕЦД) и Европската Унија, посветена на унапредување на поврзаноста меѓу стратешкото планирање, креирањето политики и буџетскиот процес.
Во своето обраќање, Јанкуловски го истакна значењето на усогласувањето на стратешките приоритети со расположливите буџетски ресурси, како предуслов за поефикасно спроведување на јавните политики и постигнување конкретни развојни резултати.
Тој се осврна на реформите што ги спроведува Министерството за финансии, со посебен акцент на унапредувањето на програмското буџетирање, воведувањето мерливи показатели за успешност и воспоставувањето на Интегрираниот информациски систем за управување со јавните финансии (ИФМИС).
„Буџетот не е само преглед на приходи и расходи, туку инструмент за реализација на развојните приоритети. Нашата цел е секој буџетски денар да биде поврзан со јасни цели, мерливи резултати и поголема отчетност кон граѓаните“, истакна Јанкуловски.
Тој нагласи дека реформите во управувањето со јавните финансии се насочени кон зајакнување на фискалната дисциплина, транспарентноста и ефикасноста на јавната потрошувачка, во согласност со европските стандарди и добрите меѓународни практики.
Министерството за финансии продолжува со спроведување на реформските активности за воспоставување современ, интегриран и резултатски ориентиран систем на управување со јавните финансии.
