Буџетот е стабилен, домашниот пазар ја покрива ликвидноста, а државата одговорно ги управува средствата на граѓаните, порача министерката за финансии Гордана Димитриеска-Кочоска во гостувањето во емисијата „Вин-Вин“ на Телма телевизија, одговарајќи на прашањата за повратот на ДДВ, ликвидноста, долгот и јавните финансии.
Работата на министерот за финансии секогаш е деликатен баланс. Од една страна имаме буџетски обврски и постоечки долг кој треба да се сервисира, а од друга – потребата да ги поддржиме граѓаните и компаниите. Но, токму затоа ја водиме фискалната политика одговорно, со јасни приоритети и без импровизации, рече министерката.
Таа изјави дека многу внимателно се настапува со задолжувањето на меѓународните пазари и дека финансирањето на Буџетот во најголем дел е обезбедено преку домашниот пазар, а не преку нова еврообврзница.
Во јануари успешно ја сервисиравме еврообврзницата во износ од 500 милиони евра – средствата беа обезбедени преку надворешно финансирање. Но, остатокот од годината, согласно планот, го затвораме преку домашен пазар затоа што во услови на високи каматни стапки на глобалните пазари, домашното финансирање е поевтино, пофлексибилно и побезбедно. Исто така, преку таков пристап го зајакнуваме домашниот финансиски пазар и ја градиме довербата кон државните хартии од вредност, објасни Димитриеска-Кочоска и воедно потенцираше дека е важно да се разбере дека тоа не е сигнал дека државата нема пристап до меѓународните пазари.
Напротив, но ние преферираме да настапиме на тие пазари во подобар тајминг, со посилна позиција и подобри услови – кога инвеститорите ќе можат да ја препознаат стабилноста и одржливоста на економските политики на новата влада, кажа министерката.
Во врска со коментарите за наводно доцнење на повратот на ДДВ, таа нагласи дека во системот постои прецизна евиденција и дека не постои системски проблем.
Компаниите кои имаат право на поврат и уредно ги доставиле документите, не чекаат. Немаме такви случаи во кои сериозни компании со налог од УЈП чекале 6 или 9 месеци. Ако има поединечен случај, ќе го провериме. Но мора да правиме разлика меѓу реална забелешка и произволна генерализација.
На прашањата околу преносот на дел од добивката на Народната банка во Буџетот, министерката истакна дека тоа не е мешање во независноста туку одговорно користење на јавните средства.
Парите – дали се во Буџетот, во Народната банка или во некое јавно претпријатие – се пари на граѓаните. Ние само управуваме со нив. И ако Народната банка има акумулирана добивка и резерви, не гледам причина тие да не бидат ставени во функција на јавниот интерес. Тоа е фискална одговорност, а не ризик, заклучи Димитриеска-Кочоска.
