7 октомври 2025, Скопје — Граѓаните и бизнисите во РС Македонија од денеска ќе ги користат придобивките од приклучувањето на земјата кон СЕПА (Единствена област за плаќања во евра). Европскиот совет за плаќања ги одобри апликациите на 9 домашни банки, кои се подготвени да започнат со извршување плаќања рамките на шемата за кредитни трансфери СЕПА, додека останатите 3 банки се очекува да се приклучат до крајот на годината.
„Ова значи дека земјава практично станува дел од Единствената област за плаќања во евра (СЕПА) со што граѓаните и компаниите ќе можат да вршат плаќања во евра на ист начин како и во земјите од Европската Унија. Од членството во СЕПА се очекуваат бројни придобивки и за граѓаните и за компаниите, но и за економијата во целина. Пред сѐ се очекуваат побрзи, побезбедни и поевтини прекугранични плаќања во евра. Ова е особено важно за македонската економија којашто се карактеризира со висок степен на трговска отвореност и голем обем на прекугранични плаќања. Оттаму, и потенцијалот за заштеда во трошоците, за подобрување на ликвидноста и за зголемување на конкурентноста на компаниите е голем. Ова може да одигра значајна улога во процесот на натамошна трговска интеграција, забрзан економски раст и намалување на доходовниот јаз со ЕУ“, рече министерката за финансии Гордана Димитриеска-Кочоска.
Таа истакна дека клучниот чекор во спроведувањето на оваа реформа беше донесувањето на Законот за платежни услуги и платни системи, кој беше подготвен од страна на Министерството за финансии и предложен на Владата, како и усвојувањето на подзаконските акти од страна на Народната банка.
„Овој проект е значаен исчекор кон унапредување на условите за работење и живеење во Македонија, со што се прилагодуваат стандардите на нашата земја кон европските. Министерството за финансии и Народната банка ќе продолжат со реформи насочени кон економски развој и подобрување на услугите за граѓаните и бизнисите“, нагласи министерката.
Барањето за пристапување кон СЕПА беше поднесено на 10 јули 2024 година, додека на 6 март 2025 беше прифатена апликацијата од страна на Европскиот совет за плаќања за приклучување кон СЕПА со што се овозможи и приклучување на домашните банки во платежните шеми преку кои се извршуваат плаќања во евра. Станува збор за регион кој опфаќа 41 земја од Европа.
