20 септември 2025, Скопје - Агенцијата за кредитен рејтинг „Фич“ го потврди кредитниот рејтинг на РС Македонија на нивото „BB+“ со стабилен изглед.
Оваа оценка е потврда за стабилноста на економските политики и сигнал за доверба во макроекономските перспективи на земјата.
Во својот извештај, „Фич“ нагласува дека кредибилните и доследни макроекономски политики, долгогодишната политика на фиксен девизен курс и подобрите показатели за управување во однос на земјите со слична оценка остануваат клучни фактори што ја поддржуваат стабилноста.
Во првата половина од 2025 година, реалниот БДП порасна за 3,2%, поддржан од силна приватна потрошувачка и зголемен извоз.
Економските изгледи за следниот период се позитивни.
„Фич“ очекува економијата да оствари раст од 3,2% за целата 2025 година и просечно 3,4% во периодот 2026 – 2027 година, што е над потенцијалниот долгогодишен раст од околу 3%.
Растот ќе го поттикнат и големите инфраструктурни проекти кои ќе создадат нови можности за инвестиции и поврзување на економијата со европските пазари.
Посветеноста кон процесот на евроинтеграции е дополнително препознаена како сидро за спроведување структурни реформи и зајакнување на институциите.
Воедно се очекува умерено намалување на странските директни инвестиции, по рекордните 7% од БДП во 2024 година, кое главно се должи на недостигот на работна сила и глобалната неизвесност во автомобилската индустрија.
Според „Фич“ ограничувачки фактори за економскиот развој се негативните демографски трендови и нискиот раст на продуктивноста, кои претставуваат структурни предизвици на среден рок.
„Фич“ ја нотира одложената имплементација на Законот за буџети поради инвестициските активности и очекува постепено намалување на буџетскиот дефицит и стабилизирање на јавниот долг на ниво значително под прагот од 60% од БДП на среден рок.
Потврдата на кредитниот рејтинг на „BB+“ со стабилен изглед е значаен сигнал до меѓународните финансиски пазари и инвеститорите дека РС Македонија успешно ја зачувува економската стабилност во услови на глобални предизвици.
Оваа одлука е дополнителна потврда за кредибилноста на економските политики и претставува охрабрување за продолжување на реформите, за јакнење на фискалната дисциплина и за подобрување на конкурентноста на економијата, со крајна цел обезбедување повисок животен стандард за граѓаните и нови можности за развој.
