24 септември 2025 година, Скопје - Економските показатели во одредени сектори конечно покажуваат позитивни резултати. Ме радува тоа што после долго време податоците за бруто-домашниот производ (БДП) покажуваат дека приватниот сектор е главниот двигател на економскиот раст во нашата земја, со особено значајно учество на градежништвото и земјоделството. Ова го истакна министерката за финансии Гордана Димитриеска-Кочоска во своето гостување во емисијата „Бизнис 21“ на ТВ21, притоа нагласувајќи дека растот денес не зависи од јавната потрошувачка, туку од активностите и инвестициите на приватните компании.
„Она што посебно ме радува и охрабрува е фактот дека приватниот сектор создава нови можности, инвестира во развој и ја стимулира продуктивноста на економијата. Градежништвото бележи забележителен раст, кој директно влијае врз инфраструктурниот развој, а земјоделството, после долги години негативни резултати, во последните два квартала покажува позитивна динамика. Ова е јасен показател дека сме на вистинскиот пат и дека остваруваме резултати согласно она што како влада сме го планирале“, кажа министерката.
Таа додаде дека, и покрај предизвиците во јавниот сектор и пазарните ограничувања, приватните компании продолжуваат да ја стимулираат економијата, притоа придонесувајќи за стабилноста и одржливоста на бруто-домашниот производ. „Особено ме радува што растот сега го генерира приватниот сектор, којшто е моторот на економијата, а не јавната потрошувачка, како што беше случај во минатото“, нагласи Димитриеска-Кочоска.
Министерката истакна дека Владата останува посветена на создавање услови за понатамошен развој на приватниот сектор.
„Ќе продолжиме да креираме поволно деловно окружување, да вложуваме во инвестиции, иновации и нови работни места и да ја одржуваме фискалната дисциплина. Приватниот сектор, особено градежништвото и земјоделството покажуваат дека се основниот двигател на економскиот раст и ние ќе продолжиме да ги поддржуваме со конкретни мерки и стратегии“, нагласи таа.
„Очекуваме дека оваа позитивна динамика ќе продолжи и во следните квартали, а Владата ќе остане фокусирана на зацврстување на економските основи, поддршка на бизнисите и создавање поволна клима за инвестирање“, заклучи министерката за финансии и додаде дека овие податоци за приватниот сектор се одраз и на поддршката што ја добија компаниите од унгарскиот кредит којшто се реализира преку Развојната банка.
