6 октомври 2026, Скопје – Заменик-министерот за финансии Николче Јанкуловски, учествуваше на регионалниот форум „Beyond Compliance: Financial Reporting for Growth and Jobs“, организиран во рамки на програмата REPARIS for SMEs, која ја имплементира Центарот за реформа на финансиското известување (CFRR) на Светска банка.
Во рамки на воведната панел-дискусија, посветена на значењето на финансиското известување за економскиот раст и отворањето нови работни места, Јанкуловски ја истакна посветеноста на Владата и Министерството за финансии кон доследна примена на меѓународните стандарди за финансиско известување и понатамошно унапредување на законската и институционалната рамка во областа на сметководството и ревизијата.
„Квалитетното финансиско известување не претставува само исполнување на регулаторните обврски, туку значаен инструмент за зајакнување на довербата кај инвеститорите, подобрување на корпоративното управување и создавање поповолни услови за инвестиции, пристап до финансии и економски раст“, истакна Јанкуловски.
Тој посочи дека приоритет на Министерството за финансии е преминот од законско усогласување кон ефективна примена на меѓународните стандарди, преку јакнење на институционалните капацитети, унапредување на професионалните компетенции и зајакнување на механизмите за надзор и контрола.
Посебно внимание беше посветено на финансиската транспарентност и корпоративното управување кај претпријатијата во државна сопственост, кои треба да претставуваат пример за отчетно, одговорно и ефикасно управување со јавните ресурси.
„Веродостојните, споредливи и навремени финансиски информации се предуслов за подобри инвестициски одлуки и поефикасна распределба на капиталот. Нашата цел е да изградиме систем во кој финансиското известување ќе создава реална економска вредност, особено преку поддршка на малите и средните претпријатија и мобилизација на приватниот капитал“, нагласи заменик-министерот.
Форумот претставуваше можност за размена на искуства и добри меѓународни практики меѓу претставници на владите, меѓународните финансиски институции, регулаторните тела и професионалната заедница, со фокус на улогата на современото финансиско известување во подобрувањето на инвестициската клима и поттикнувањето на одржлив економски развој.
