3 октомври 2025, Скопје – Заменик-министерот за финансии Николче Јанкуловски учествуваше на меѓународната конференција на Економскиот факултет при УКИМ – Скопје посветена на применетите економски истражувања и нивната улога во креирањето национални стратегии и политики.
Обраќајќи се на панел-дискусијата на тема „Применето истражување како алатка за формулирање оптимални економски политики и стратегии за одржлив национален развој“ истакна дека Конференцијата е потврда на фактот дека соработката помеѓу академската заедница и институциите е клучот за справување со предизвиците во турбулентни времиња.
„Соочени со комплексните општествени и економски предизвици, креирањето политики бара суштински пристап којшто се базира на научни докази и апликативни истражувања. Значењето на апликативните истражувања и анализи, како и потребата од нивно понатамошно унапредување е јасно препознаено од страна на Министерството за финансии, па во таа насока имаме плодна соработка со меѓународните финансиски институции, кои обезбедуваат експертиза со цел јакнење на аналитичкиот и истражувачкиот капацитет на Министерството за финансии“, рече заменик-министерот.
Истакнувајќи ја важноста на соработката со академската заедница, Јанкуловски посочи дека универзитетите создаваат знаење кое мора да го вклучиме во практиката. „Градењето партнерства со академската и со меѓународната заедница е неопходно – само преку факти и истражувања можеме да носиме политики коишто се корисни и за граѓаните и за економијата“, порача заменик-министерот за финансии.
На панел-дискусијата на Економскиот факултет учествуваа и министерот за локална самоуправа Златко Перински, главниот државен ревизор Максим Ацески, академик проф. д-р Абдулменаф Беџети, проф. д-р Вил Барлет и проф. д-р Ирац Хаши.
