11 ноември 2025, Скопје - Зaменик-министерот за финансии Николче Јанкуловски денеска учествуваше на TAIEX работилница посветена на дефинирањето на јавните интересни субјекти и унапредувањето на квалитетот на ревизијата каде што ја истакна посветеноста кон институционално зајакнување и усогласување со европските стандарди.
„Ревизијата и јавниот надзор се темел на стабилноста на секој економски систем, притоа создавајќи доверба помеѓу јавната администрација, приватниот сектор и граѓаните. Без професионална и независна ревизија нема стабилни финансии, нема транспарентност ниту кредибилитет на институциите“, нагласи Јанкуловски.
Тој додаде дека Програмата на Владата 2024 – 2028 ја става ревизијата во центарот на јавните реформи со цел изградба на ефикасен и одговорен јавен сектор, силен систем на финансиски менаџмент и институционална отпорност на корупција и политички влијанија.
Особено ја истакна важноста на прецизното дефинирање на јавните интересни субјекти (PIEs) како клучен чекор во воспоставувањето кредибилен систем на ревизија, во согласност со Европската директива 2014/56/ЕУ и Регулативата 537/2014.
Јанкуловски се заблагодари за поддршката од Европската комисија и инструментот TAIEX, како и од експертите од Hellenic Accounting and Auditing Standards Oversight Board – Грција, кои ја споделуваат својата експертиза во врска со управувањето со ревизорскиот надзор и контрола на квалитет.
„Преку меѓународна соработка, размена на искуства и примена на професионални стандарди можеме да го унапредиме домашниот систем на ревизија и јавен надзор, да ја зајакнеме фискалната отчетност и да ја приближиме нашата земја кон европските стандарди на транспарентност и стабилност“, додаде заменик-министерот.
Заклучоците од работилницата треба да дадат конкретни насоки за финализација на новиот Закон за ревизија, како и за поставување механизми за контрола на квалитетот и институционална одговорност, со крајна цел ревизијата да стане гаранција за доверба и двигател на развојот.
