02 јули 2026 година, Скопје- На 2 Јули, Министерството за финансии, преку Академијата за јавни финансии, денес организираше обука на тема „Буџетски циркулар – Насоки за подготовка на буџет“, со цел унапредување на знаењата и капацитетите на буџетските корисници во процесот на подготовка на буџетот.
Обуката беше наменета за претставници на институциите кои учествуваат во процесот на буџетско планирање и имаше за цел да обезбеди практични насоки за правилна примена на Буџетскиот циркулар и подготовка на буџетските предлози.
Во рамките на обуката беа обработени теми поврзани со содржината на Буџетскиот циркулар, макроекономските претпоставки, стратешките приоритети и максималните износи на расходи, како и детални насоки за пополнување на обрасците од Буџетскиот циркулар.
Посебен акцент беше ставен на практичните аспекти при подготовката на буџетските барања, како и на насоките за пополнување на Образецот за концепт на проект и Образецот за фискален ефект кој произлегува од Реформската агенда.
Предавач на обуката беше Тоше Пановски од Секторот за буџети и фондови при Министерството за финансии, кој преку практични примери ги презентираше клучните аспекти од процесот на подготовка на буџетот и одговараше на прашањата на учесниците.
Министерството за финансии континуирано вложува во јакнењето на институционалните капацитети и унапредувањето на буџетскиот процес, со цел обезбедување поефикасно, потранспарентно и стратешки ориентирано управување со јавните финансии.
